„გვაქვს გარკვეული კითხვის ნიშნები, თუ რამდენად იყო აუცილებელი ”საკონსტიტუციო სასამართლოს შესახებ კანონში” ცვლილებების მიღება", - აღნიშნული განცხადება სახალხო დამცველმა, უჩა ნანუაშვილმა გააკეთა.

"პროცესი პროცედურული დარღვევებით წარიმართა და ეს ძალიან სამწუხაროა. დარღვეული იყო ასევე ის პროცედურებიც, რომელიც არის გაწერილი მსგავსი საკითხების განხილვისას, ასევე დარღვევა იყო, როცა გარკვეული საკითხები გაჩნდა კანონპროექტში, რაც მანამდე არ იყო, არის საკითხები, რაც იწვევს კითხვის ნიშნებს“, - აღნიშნა სახალხო დამცველმა.

14 მაისს, პარლამენტმა ”საკონსტიტუციო სასამართლოს შესახებ” კანონში ცვლილებები მესამე მოსმენით მიიღო.

”საკონსტიტუციო სასამართლოს შესახებ” კანონში ცვლილებების თანახმად, საკონსტიტუციო სასამართლოს ყველა წევრის ფიცის დადებიდან, ან საკონსტიტუციო სასამართლოს თავმჯდომარის უფლებამოსილების ვადაზე ადრე შეწყვეტიდან არა უგვიანეს ერთი თვისა, პლენუმის სხდომა ჩატარდება, რომელიც 5-წლის ვადით აირჩევს საკონტიტუციო სასამართლოს თავმჯდომარეს. ამავე წესით აირჩევს მის ორ მოადგილეს.

სასამართლოს თავმჯდომარის წარდგენის უფლება თავად საკონსტიტუციო სასამართლოს ექნება - თავმჯდომარის კანდიდატურის არჩევაში აღარ ჩაერთვება პრეზიდენტი, პარლამენტის თავმჯდომარე და უზენაესი სასამარლოს თავმჯდომარე და კანდიდატურას თავად საკონსტიტუციო სასამართლოს მოსამართლეები წარადგენენ. ამასთან, საკონსტიტუციო სასამართლოს თავმჯდომარედ ან მის მოადგილედ არ შეიძლება აირჩეს პირი, მეორე ვადით.

კიდევ ერთი პრინციპული საკითხი იმ მოსამართლეებს შეეხებათ, რომელთაც კონსტიტუციური უფლებამოსილების 10-წლიანი ვადა ეწურებათ.
სიახლეა ისიც, რომ 2/3-მდე იზრდება საკონსტიტუციო სასამართლოს პლენუმის მიერ გადაწყვეტილების მიღების კვორუმი.