დედაქალაქის საკრებულოში, სადაც თბილისის მერი დავით ნარმანია მოხსენებით გამოდის, სხდომა განახლდა.

„მე დღეს მოვედი, თქვენს წინაშე წარვსდექი, რათა წერტილი დამესვა მერიის მიმართ სხავადასხვა საკითხებთან დაკავშირებით ბოლო პერიოდში გამოთქმულ არაერთ ბრალდებას და ხელოვნურად შექმნილ აჟიოტაჟს და დავასრულო ის შოუ, რომელსაც „ნაციონალური მოძრაობა“ და მათი მიმდევრები დგავენ. მოვედი, რათა დავასრულო სიცრუის პროპაგანდა, მისი ტირაჟირება და ერთხელ და სამუდამოდ პასუხი გავცე ყველა იმ კითხვას , რა კითხვაც ხშირ შემთხვევაში აბსოლუტურად უსაფუძვლოდ ისმის და უმეტეს შემთხვევაში საზოგადოების შეცდომაში შეყვანას ისახავს მიზნად. თუ დღესაც ვინმე შეეცდება რომ საზოგადოება შეიყვანოს შეცდომაში, არ მოგვცეს ინფორმაციის ობიექტურად გადმოცემის საშუალება, ეს იქნება ამ ადამიანების პასუხისმგებლობა თბილისელების წინაშე“, - განაცხადა დავით ნარმანიამ სხდომის დაწყებისას.

ამის შემდეგ მან სხვადასხვა საკითხზე ისაუბრა, მათ შორის საბავშვო ბაღებზე. რამდენიმე წუთში დარბაზში გაისმა შეძახილი „ბოტანიკური“, რა დროსაც რამდენიმე მოქალაქემ პლაკატი გაშალა, რომელზეც ეწერა „ბოტანიკური ბაღის ქურდები“. პლაკატზე ბიძინა ივანიშვილის ფოტოც იყო გამოსახული. დარბაზში ხმაური და დაპირისპირება დაიწყო. დაცვის პოლიციის თანამშრომლებმა აღნიშნული მოქალაქეები დარბაზიდან გაიყვანეს. ხმაური დერეფანშიც გაგრძელდა, რის შემდეგაც სიტუაცია დასტაბილურდა.