ირაკლი ალასანია არ გამორიცხავს, რომ ე.წ. „კაბელების საქმეზე“ პროკურატურამ ძიება მის წინააღმდეგ გააგრძელოს. ამის შესახებ მან გადაცემა „არჩევანში“ სტუმრობისას განაცხადა. ალასანია ივანიშვილს ურჩევს, 5 უდანაშაულო პირის ნაცვლად თვითონ დააპატიმროს.

„არანაიარად არ გამოვრიცხავ ამას. დიდი ალბათობაა ამის და მე მინდა მივმართო ივანიშვილს თქვენი ეთერით, კიდევ ერთხელ: მე დამაკავოს, იმიტომ რომ, თუ მას უნდა მე ვაგო პასუხი მასთან შეუთანხმებელი პოლიტიკური ნაბიჯებისთვის, თუ მას უნდა რომ ჩემზე იყაროს ჯავრი, მე მოვუწოდებ რომ გააკეთოს ეს ჩემს წინააღმდეგ. მე დღესვე მზად ვარ წავიდე ციხეში, დღესვე მზადა ვარ, იმიტომ რომ ეს უსამართლობა იმდენად დიდი და დანაშაულებრივია, რომ მე მართლა მირჩევნია ამ ადამიანების, ამ ოჯახების ამ წვალებას, რომ მე ვიყო ციხეში და დაველოდო იმ დროს, როდესაც ეს უსამართლობა დამთავრდება. მაგრამ კიდევ ერთხელ ვიტყვი, რომ მიუხედავად იმისა, რომ მათ ეს უნდოდათ, ის ვერ ბედავს ასეთი ნაბიჯის გადადგმას და მსხვერპლად შეწირა უდანაშაულო ხუთი ადამიანი. აი, კიდევ ერთხელ ვიწვევ თქვენი ეთერით, ღია ეთერში დავჯდეთ და ვისაუბრებ მასთან და დავუმტკიცებ მას, რომ ეს რაც ჩაიდინა, ეს არ არის მხოლოდ პოლიტიკური შურისძიება ერთ პოლიტიკურ ძალაზე, ეს არის შურისძიება მთლიანად ქართულ სახელმწიფოზე, რომელსაც ის მიზანმიმართულად ანგრევს იმიტომ, რომ სწორედ მისი არაფორმალური ხელები არის დღეს ყველგან, ყველა მართვის სადავეში, განსაკუთრებით ძალოვან სტრუქტურებში,“ განაცხადა ირაკლი ალასანიამ.