"პრემიერ-მინისტრმა ხიდაშელის ხასიათის მიხედვით უნდა გადაწყვიტოს რა და როგორ გააკეთოს? ეს კვირიკაშვილის მხრიდან სისუსტის პირდაპირი გამოვლინებაა, და მხოლოდ ერთ რამეს ნიშნავს, რომ მას ძალაუფლების ავტონომიის არაფერი გაეგება," აღნიშნული განცხადება პოლიტოლოგმა სოსო ცინცაძემ გაზეთ "რეზონანსთან" საუბრისას გააკეთა.


"მიუხედავად იმისა, რომ მე პირადად პრემიერ მინისტრ გიორგი კვირიკაშვილის მიმართ კეთილგანწყობილი და გულშემატკივარი ვარ. ის, როგორც ადამიანი, ყველას მოსწონს. მასთან დაპირისპირება ოპოზიციასაც კი უჭირს, რადგანაც ის საკმაოდ დადებითი და პოზიტიური ადამიანია. სამწუხაროდ ეს ყველაფერი ფორმაა, მაგრამ ჩნდება კითხვა - შეუძლია კი ამ ადამიანს, როგორც პოლიტიკოსს, ლიდერის ფუნქციები შეითავსოს? ამ ხნის განმავლობაში საწინააღმდეგოს დასამტკიცებლად ნაბიჯიც კი არ გადაუდგამს. მეტსაც გეტყვით, ბოლო ფაქტი, როდესაც "რესპუბლიკელ" მინისტრებზე ამბობს, რომ მე კი მყავს შერჩეული ხალხი, რომლებმაც ისინი უნდა ჩაანაცვლონ, მაგრამ არ ვიცი თავად როდის წავლენო. ამით გამოდის, რომ ის მზადაა ამ პარტიის დღის წესრიგს გაჰყვეს. იმის მაგივრად, რომ გადაწყვეტილება თავად მიიღოს, გამოდის, რომ სხვების გადაწყვეტილებებზე დადის. თინა ხიდაშელს მინისტრობიდან წასვლა როცა მოეხასიათება, მაშინ წავა. ესე იგი პრემიერ-მინისტრმა ხიდაშელის ხასიათის მიხედვით უნდა გადაწყვიტოს რა და როგორ გააკეთოს? ეს კვირიკაშვილის მხრიდან სისუსტის პირდაპირი გამოვლინებაა და მხოლოდ ერთ რამეს ნიშნავს, რომ მას ძალაუფლების ავტონომიის არაფერი გაეგება. ის მზად არ არის იმისთვის, რომ ძალაუფლება ხელში აიღოს. გიორგი კვირიკაშვილი კარგი ადამიანია, მაგრამ შინაარსობრივად ფასადია, რადგანაც მას ძალაუფლებასთან არანაირი საერთო არ აქვს," განაცხადა სოსო ცინცაძემ.