"ეგვიპტის ავიახაზების" ცნობით, გაუჩინარებული თვითმფრინავის ბორტზე 30 ეგვიპტელი, საფრანგეთის 15 მოქალაქე, ერთი ბრიტანელი, ორი ერაყელი, ასავე კანადის, ბელგიის, ქუვეითის, საუდის არაბეთის, სუდანის, ჩადის და პორტუგალიის მოქალაქეები იმყოფებოდნენ.


პარიზიდან ქაიროში მიმავალი თვითმფრინავის ბორტზე სულ 66 ადამიანი იმყოფებოდა, მათ შორის 56 მგზავრი, მათგან 3 ბავშვი და ეკიპაჟის 10 წევრი.


ცოტა ხნის წინათ,  ეგვიპტის ავიაციის სამინისტროს მაღალჩინოსნებზე დაყრდნობით სააგენტო Associated Press-მა გაავრცელა ინფორმაცია, რომ EgyptAir-ის კუთვნილმა ლაინერმა, A320-მა კატასტროფა განიცადა.

 
მათი ინფორმაციით, ამჟამად დაწყებულია თვითმფრინავის ფრაგმენტების ძებნა. სამძებრო სამუშაოები ხმელთაშუა ზღვაში მიმდინარეობს.

 
ლაინერის ჩამოვარდნა ეგვიპტის მთავრობას ოფიციალურად ჯერჯერობით არ დაუდასტურებია.


ლაინერი A320 რადარებიდან ეგვიპტის საჰაერო სივრცის გადაკვეთის შემდეგ გაქრა. ეგვიპტური მედიის ცნობით, ბოლო კონტაქტი მფრინავთან თვითმფრინავის გაუჩინარებამდე 10 წუთით ადრე მოხდა.


CNN -ის ცნობით, იმ სივრცეში, სადაც თვითმფრინავის გაუჩინარება მოხდა, საკმაოდ კარგი და წყნარი ამინდია.


BBC -ს ცნობით, ამ წუთებში სამაშველო ჯგუფები სამძებრო სამუშაოებში არიან ჩართული.


გასული წლის ოქტომბერში რუსული სამგზავრო თვითმფრინავი, რომელიც რუსეთში შარმ ელ-შეიხიდან მიფრინავდა, სინას ნახევარკუნძულზე ჩამოვარდა და ბორტზე მყოფი 224 ადამიანის სიცოცხლე იმსხვერპლა. მოგვიანებით, მოსკოვის ოფიციალურმა პირებმა განაცხადეს, რომ თვითმფრინავი ასაფეთქებელი მოწყობილობის გამოყენების შედეგად ჩამოვარდა.


მაშინ ისლამური სახელმწიფოს მებრძოლებმა განაცხადეს, რომ თვითმფრინავი მათ დაბომბეს.