„თავისუფალი დემოკრატების“ ე.წ. კაბელების საქმეზე მსჯავრდებულთა მხარდამჭერი აქცია დღეს მთავარ პროკურატურასთან 14:00 საათზე დაიწყო და დაახლოებით ორ საათში დასრულდა.

აქციაზე პარტიის ლიდერებმა განაცხადეს, რომ ჯარისკაცები უკანონო პატიმრობაში არიან, მათ დაკავებაში ხელისფლება დაადანაშაულეს.

დღესვე, „თავისუფალი დემოკრატების“ ლიდერმა ირაკლი ალასანიამ აქციაზე სიტყვით გამოსვლისას განაცხადა, რომ პოლიტიკური მოძრაობა იწყებს ხელმოწერების შეგროვებას, რათა პრეზიდენტს პეტიციით მიმართონ, რათა ე.წ. კაბელების საქმეზე დაკავებულები შეიწყალოს.

ირაკლი ალასანიამ დღესვე განაცხადა, რომ მათი ინფორმაციით, პრეზსიდენტი ძალიან წუხს ამ ფაქტთან დაკავშირებით და იმედი გამოთქვა, რომ სამართლიანობა აღდგება და ჯარისკაცები უახლოეს მომავალში გათავისუფლდებიან.

„ ერთადერთი ლეგიტიმაციის მატარებელი ინსტიტუტი არის პრეზიდენტის ინსტიტუტი. დღეს პროკურატურასთან ვაპროტესტებთ უსამართლობას, მაგრამ სამართალს ვეძებთ პრეზიდენტის ინსტიტუტში“, – განაცხადა ირაკლი ალასანიამ.

ე.წ. კაბელების საქმეზე მსჯავრდებულთა მხარდამჭერ აქციას დღეს სხვა პოლიტიკური ძალების წარმომადგენლებიც შეუერთდნენ, კერძოდ სოლიდარობა დაკავებულებს გამოუცხადეს „ერთიანი ნაციონალური მოძრაობის“, „ეროვნულ-დემოკრატიული პარტიის“, „ახალი მემარჯვენეებისა“ და პაატა ბურჭულაძის პარტიის “სახელმწიფო ხალხისთვის“ წარმომადგენლებმა. აქცია გენერალურ პროკურატურასთან საქართველოს ჰიმნით დასრულდა.

როგორც ცნობილია, ე.წ. კაბელების საქმეზე თავდაცვის სამინისტროს 5 თანამშრომელი დამნაშავედ 14 მაისს ცნეს. მათ 7-7-წლიანი პატიმრობა შეეფარდათ.