„ნაციონალური მოძრაობის“ ერთ-ერთი ლიდერი გიგა ბოკერია „ქართული ოცნების“ მხარდამჭერების გამოწვევას ცდილობდა - აცხადებს „ქართული ოცნება-დემოკრატიული საქართველოს“ აღმასრულებელი მდივანი, ირაკლი კობახიძე.

მისი თქმით, წყალტუბოს ერთ-ერთ საარჩევნო უბანთან მობილიზებულები არიან ერთგვარი ზონდერ ჯგუფის წარმომადგენლებიც, რომლებიც, მათი ინფორმაციით, ერთ-ერთი მეზობელი რაიონიდან არიან ჩამოყვანილები. ირაკლი კობახიძე ასევე აღნიშნავს, რომ “ნაციონალური მოძრაობის“ ლიდერები „თავისუფალი ზონის“ წევრებთან ერთად, გარდაბანში დადგმული სპექტაკლის განმეორებას ცდილობენ.

„თქვენ იცით, რომ გარდაბანში ისინი ძალიან დიდი სხვაობით აგებდნენ არჩევნებს და იმისათვის, რომ შეეფუთათ ეს ყველაფერი, დადგეს სპექტაკლი „თავისუფალი ზონის“ მონაწილეობით. ველოდებით, რომ ასეთივე სპექტაკლები დადგან იმისთვის, რათა ფონი გააფუჭონ, მაგრამ ეს საერთო სურათს მაინც ვერ შეცვლის. საერთო სურათი იქნება ის, რომ „ნაციონალური მოძრაობა“ მიიღებს საკადრის პასუხს მოსახლეობისგან და ჩვენ მივიღებთ ჩვენს ღირსეულ შედეგს ამ არჩევნებში“, - განაცხადა ირაკლი კობახიძემ.