დუშეთის მუნიციპალიტეტის საკრებულოს თავმჯდომარემ ”ქართული ოცნება” დატოვა და პაატა ბურჭულაძის პოლიტიკურ მოძრაობას შეუერთდა.

ამის შესახებ თავად გიორგი ლაფანაშვილმა "მოძრაობა - სახელმწიფო ხალხისთვის" ოფისში გამართულ პრესკონფერენციაზე განაცხადა.

"ჩემი გადაწყვეტილების მიზეზი გახდა ის, რომ საქართველოს მოსახლეობა, ქართველი ხალხი და პირადად მე, წლების განმავლობაში რისთვისაც ვიბრძოდით, დაპირებები რისთვისაც გავერთიანდით ”ქართულ ოცნებაში”, სამწუხაროდ, ვერ ან არ შესრულდა", - განაცხადა ლაფანაშვილმა.

დუშეთის საკრებულოს თავმჯდომარემ „ქართული ოცნების“ დატოვების შემდეგ guardian.ge-ს განუცხადა, რომ თავის დროზე მისი „ქართულ ოცნებაში“ შესვლის მიზანი სააკაშვილის რეჟიმთან ბრძოლა და უსამართლობის დამარცხება იყო. დუშეთის საკრებულოს თავმჯდომარე მიიჩნევს, რომ მისი მცდელობა ფუჭი აღმოჩნდა და „ქართულმა ოცნებამ“ იმედები ვერ გაამართლა.


“ქართულმა ოცნებამ“ არ შეასრულა დანაპირები, ქვეყანაში კვლავ უსამართლობაა, მძიმე მდგომარეობაშია ეკონომიკა, უჭირს ხალხს. მე ვუერთდები პაატა ბურჭულაძის პოლიტიკურ მოძრაობას, ეს გუნდი ჩემში ნდობას იწვევს და მსურს მათ გვერდით დავდგე და ერთად ავაშენოთ ქვეყანა“ - განაცხადა  guardian.ge - სთან საუბარში გიორგი ლაფანაშვილმა.


დუშეთის საკრებულოს თავმჯდომარემ განმარტა, რომ შეთავაზება „მოძრაობა - სახელმწიფო ხალხისათვის“ წარმომადგენლებისგან არ მიუღია და ეს მისი გადაწყვეტილება იყო. გიორგი ლაფანაშვილი  თანამდებობის დატოვებას არ აპირებს და დარწმუნებულია, რომ 2016 წლის არჩევნებში გამარჯვების შემდეგ პაატა ბურჭულაძის პოლიტიკური მოძრაობა ქვეყანაში ბევრ პრობლემას მოაგვარებს და ხალხს იმედს აღარ გაუცრუებს.