„ნაციონალური მოძრაობა“ არჩევნებში გამარჯვების შემდეგ პოლიტიკური შერიგების კანონს მიიღებს, - ეს განცხადება „ნაციონალური მოძრაობის“ ერთ-ერთმა ლიდერმა დავით ბაქრაძემ გააკეთა.

ბაქრაძის თქმით, 2016 წლის ოქტომბრის არჩევნებში გამარჯვების შემდეგ ქვეყანაში ძალადობით და მუშტით გადაწყვეტილი პოლიტიკა დასრულდება.

„დღეს ბევრ ადამიანს აწუხებს კითხვა, რომ როგორც ჩანს „ნაციონალური მოძრაობა“ იგებს ოქტომბერში და ხომ არ დაიწყება ანგარიშსწორების ახალი ტალღა. მე და მთელი ჩვენი გუნდი ვართ იმის გარანტი, რომ ოქტომბერში ის სირცხვილი, სისასტიკე, რაც გუშინ ვიხილეთ, დასრულდება. პირველი ორი კანონი, რომელსაც არჩევნებში გამარჯვების შემდეგ მივიღებთ, იქნება კანონი პოლიტიკური შერიგებისა და ბიზნეს ამნისტიის შესახებ. არ აქვს მნიშვნელობა, ვინ არის, „ქართული ოცნების“ მხარდამჭერი ან ვინ აფინანსებს, ჩვენ ყველა ვართ ერთი ქვეყნის შვილები, ამიტომ პოლიტიკურ მოწინააღმდეგს უნდა მოექცე პოლიტიკურად და ქვეყნის შიგნით მტრები არ უნდა ვეძებოთ. პირადად ჩემი მთავარი დაპირებაა, რომ ქვეყანაში არჩევნების შემდეგ შეწყდება ძალადობა“, - განაცხადა ბაქრაძემ.