ირანის უმაღლესი სასულიერო ორგანოს ექსპერტთა ასამბლეის ხელმძღვანელად სამშაბათს ახალი, მძლავრი ანტი-დასავლელი სასულიერო პირი აირჩიეს, რაც იმის მანიშნებელია, რომ უკომპრომისო სასულიერო პირები სრულად აკონტროლობენ იმ ორგანოს, რომელიც მომავალ სულიერ ლიდერს ირჩევს. ამის შესახებ "როიტერსი" წერს.


90 წლის აჰმად ჯანათი ღია კრიტიკოსია პრეზიდენტ ჰასან რუჰანის და მისი მცდელობების, დასავლეთთან ურთიერთობების ნორმალიზებით დაასრულოს ირანის მსოფლიო იზოლაცია. ირანის სახელმწიფო მედიის თანახმად, ჯანათი 51 ხმით აირჩიეს. იგი ასეევე სამეურვეო საბჭოს თავმჯდომარეა.


88-კაციანი ასამბლეა, რომელიც ძირითადად ასაკში მყოფი სასულიერო პირებისაგან შედგება, მოელიან, რომ სულიერი ლიდერის აიათოლაჰ ალი ხამენეის შემცვლელს აირჩევს. ხამენეი 77 წლისაა და გავრცელებული ცნობით, ჯანმრთელობის მდგომარეობა შერყეული აქვს.


სულიერი ლიდერი საბოლოო სიტყვას ამბობს სახელმწიფოსთვის მნიშვნელოვან ყველა საკითხზე, მათ შორის საგარეო პოლიტიკაზე. იგი არის შეიარაღებული ძალების მთავარსარდალი და ნიშნავს სასამართლო სისტემის ხელმძღვანელ პირებს, სახელმწიფო მაუწყებლობის ხელმძღვანელს და ეკონომიკური მიმართულებების მთავარ პირებს. პრეზიდენტს კი მასთან შედარებით მცირე ძალაუფლება აქვს.


ახალი ასამბლეისთვის გაგზავნილ წერილში, რომელიც სახელმწიფო მედიამ გაავრცელა, ხამენეიმ სთხოვა ახალ ასამბლეას "დაიცვან ირანის ისლამური და რევოლუციური იდენტობა" და ყურადღება მიაქციონ "(მომავალი) სულიერი ლიდერის პერსონალურ და პოლიტიკურ ღვთისმოშიშობას".