ასპინძის მუნიციპალიტეტში 5 მასშტაბური პროექტის - 9,1 კმ სიგრძის საერთო მოცულობის გზის მოასფალტებაა დაგეგმილი, - აღნიშნული განცხადება ასპინძის მუნიციპალიტეტის გამგებელმა ლევან ცაბაძემ guardian.ge-სთან საუბრისას გააკეთა.  


ლევან ცაბაძის ინფორმაციით, ასფალტ-ბეტონის საფარის დაგება მიმდინარეობს სოფლების ორგორისა და საყუდაბელის დამაკავშირებელი გზის 3 700 მეტრიან მონაკვეთზე. პროექტის ღირებულებაა 760 046 ლარი. პროექტი სამწლიანია, რომლის პირველი ეტაპი გასულ წელს ძველი-ჭობარეთის გზის რეაბილიტაციით დაიწყო და 2017 წელს დასრულდება. შედეგად ოთხი სოფლის 1500-მდე მცხოვრები კეთილმოწყობილი გზით შეძლებს ადმინისტრაციულ ცენტრთან დაკავშირებას.


ასპინძის გამგებლის თქმით, სარეაბილიტაციო სამუშაოები ხორციელდება ასევე ასპინძის ციხესთან, მეფე ერეკლე მეორის ქუჩაზე, და სოფელ ოთაში მისასვლელ გზაზე. პროექტის ფარგლებში ასფალტ-ბეტონის საფარი იგება 1 200 მეტრი სიგრძის გზის მონაკვეთზე. ამ დროისთვის მიმდინარეობს ნაპირსამაგრი სამუშაოები, სანიაღვრე არხების მოწყობა და გზის გრუნტის მომზადება ასფალტის საფარის დასაგებად. აღნიშნული პროექტის განხორციელებისთვის 297 783 ლარი დაიხარჯება.

როგორც ლევან ცაბაძე აცხადებს, უკვე დასრულებულია დაბა ასპინძაში, გურამიშვილის ქუჩაზე მიმდინარე ინფრასტრუქტურული სამუშაოები, რომლის ფარგლებში ასფალტის საფარი დაიგო გზის 1 კილომეტრიან მონაკვეთზე. პროექტი 262 ათასი ლარით დაფინანსდა. ასევე დასრულდა სოფელ ნაქალაქევში მისასვლელი გზის მოასფალტება. პროექტი 348 255 ლარით დაფინანსდა. ასპინძის მუნიციპალიტეტში მიმდინარე ინფრასტრუქტურული პროექტები რეგიონებში განსახორციელებელი პროექტების ფონდისა და ადგილობრივი ბიუჯეტის თანადაფინანსებით ხორციელდება და ჯამში ამისათვის 2 102 169 ლარია გათვალისწინებული.