”აუდიტორია 115"-ის წევრები სახელმწიფო უნივერსიტეტის თვითმმართველობის ყოფილ თავმჯდომარეს ფიზიკურ შეურაცხყოფაში ადანაშაულებენ. როგორც სტუდენტები აცხადებენ, ისინი ხელისუფლებას სთხოვენ თვითმმართველობის გაუქმების შესახებ პოზიცია დღეს, 18:00 საათამდე დააფიქსიროს, წინააღმდეგ შემთხვევაში, ”აუდიტორია 115"-ის წევრები პერმანენტულ აქციებს დაიწყებენ.

პარალელურად აცხადებენ, რომ დღეს, 18:00 საათზე, თსუ-ში საპროტესტო აქცია გაიმართება.

სტუდენტურ თვითმმართველობასა და ”აუდიტორია 115"-ის შორის მომხდარ დაპირისპირებას არ უარყოფენ არც სახელმწიფო უნივერსიტეტის ადმინისტრაციაში. ამასთან ადმინისტრაცია და რექტორატი გმობს სტუდენტებს შორის მომხდარ დაპირისპირებას და აცხადებენ, რომ საკითხს ეთიკის კომისია შეისწავლის.

რექტორის მოვალეობის შემსრულებლის დარეჯან თვალთვაძის განცხადებით, სტუდენტებს შორის ნებისმიერი სახის დაპირისპირება მიუღებელია და მსგავსი ფაქტები უნივერსიტეტში არ უნდა ხდებოდეს.

„ვგმობთ ძალადობის ყველანაირ გამოვლინებას. ჩვენ არ უნდა დავუშვათ, რომ გარკვეული პროვოკაციების საფუძველზე უნივერსიტეტში სიტუაცია კიდევ უფრო დავძაბოთ. მოვუწოდებ ყველა სტუდენტს, პროფესორს, უნივერსიტეტის თანამშრომელს იყვნენ ფხიზლად, რათა მსგავსი ფაქტები არ გამეორდეს და არ გადაიზარდოს უფრო დიდ დაპირისპირებაში“, - განაცხადა რექტორის მოვალეობის შემსრულებელმა.

თსუ-ს ინფორმაციით, თბილისის სახელმწიფო უნივერსიტეტში 24 მაისს ორ სტუდენტს შორის მომხდარ სიტყვიერ შელაპარაკებას რამდენიმე სტუდენტს შორის ფიზიკური დაპირისპირება მოჰყვა. სიტუაცია უნივერსიტეტის დაცვისა და უსაფრთხოების სამსახურის ჩარევით განიმუხტა.