ახალქალაქის მუნიციპალიტეტის გამგებლის, ედუარდ აღასარიანის ცნობით, მუნიციპალიტეტში 3 მსხვილი ინფრასტრუქტურული პროექტი მიმდინარეობს.


როგორც guardian.ge-სთან საუბარში აღასარიანმა განაცხადა, პროექტების სარეაბილიტაციო სამუშაოებს რეგიონული განვითარების ფონდი აფინანსებს და სამ პროექტზე, ჯამში, 2 მლნ 800 000 ლარი დაიხარჯება.


„წელს ბევრი მნიშვნელოვანი პროექტის განხორციელებას ვგეგმავთ. ნაწილი უკვე გავაკეთეთ,  ახლაც ვმუშაობთ, ნაწილი კი მიმდინარე წლის განმავლობაში შესრულდება. ამ ეტაპზე, 3 პროექტია მიმდინარეობის პროცესში, ამ წუთებშიც ხორციელდება სამუშაოები. ეს პროექტებია გზების მოასფალტება, წყლის სისტემის რეაბილიტაცია და სტადიონის აღდგენითი სამუშაოები.
გზების სარეაბილიტაციო სამუშაოები ხორციელდება ახალქალაქში და ასევე კეთდება 1 700 მეტრიანი ახალქალაქი-ბავრას დამაკავშირებელი გზის მონაკვეთი.


ხორციელდება ასევე სოფელ ბურნაშეთში წყალგაყვანილობის რეაბილიტაცია, რაც სასიცოცხლოდ მნიშვნელოვანია.


და ბოლოს, მესამე დიდი პროექტი, რომელიც ახლა ხორციელდება, არის ახალქალაქის ცენტრალური სტადიონის რეაბილიტაცია.


შემიძლია გითხრათ, რომ წყლის სისტემისა და სტადიონის რეაბილიტაცია, მაქსიმუმ 15 დღეში, ივნისის შუა რიცხვებში დასრულდება. რაც შეეხება გზების მოასფალტებას, ამ სამუშაოებს ივლისის ბოლოსთვის დავასრულებთ, აღნიშნული სამუშაოების უფრო სწრაფ ტემპში გაკეთება იყო დაგეგმილი, თუმცა, ეს გადაუღებელი წვიმის გამო ვერ ხერხდება“- განუცხადა guardian.ge-ს ედუარდ აღასარიანმა.