"ეს არის ძალიან დიდი მოვლენა, რომ ლევილის შატო საქართველოს უბრუნდება" - აღნიშნული განცხადება პრემიერ-მინისტრმა, გიორგი კვირიკაშვილმა გააკეთა. პრემიერის ინფორმაციით, ლევილის მამული შემოდგომამდე საქართველოს გადმოეცემა. 

„დიდი მადლობა მინდა გადავუხადო მათ, რომელთაც ხელი მოაწერეს საქართველოს სახელმწიფოსთვის ლევილის მამულის დაბრუნების განზრახულობათა ოქმს. ეს არის ძალიან დიდი მოვლენა, რომ ლევილის შატო საქართველოს უბრუნდება. ის ყოველთვის ისედაც ქართველთა საკუთრება იყო, თუმცა გუშინ ხელი მოეწერა მნიშვნელოვან ოქმს, რომლის შედეგადაც საქართველოს შემოდგომის ბოლომდე გადმოეცემა ლევილის მამული“, - განაცხადა კვირიკაშვილმა.

გუშინ საზეიმოდ გაფორმდა ლევილის მამულის გადმოცემის წინასწარი თანხმობის აქტი, რომელსაც ხელი საფრანგეთში მცხოვრებ ქართველ ემიგრანტთა შთამომავლებმა იუსტიციისა და დიასპორის მინისტრების თანდასწრებით მოაწერეს.

ისტორიული აქტით - წინასწარი თანხმობის დოკუმენტით, საბოლოოდ განისაზღვრა, რომ ლევილის მამულის, როგორც საქართველოს დამოუკიდებლობისთვის ბრძოლის სიმბოლოს, საქართველოს სახელმწიფოსთვის გადაცემის საბოლოო აქტის ხელმოწერა 20 სექტემბრისთვის დასრულდება.

„ისტორიული დღეა იმიტომ, რომ აქ, სადაც ნოე ჟორდანიამ, ნოე რამიშვილმა, ჩხენკელმა გეგეჩკორმა და სხვებმა გამოაცხადეს საქართველოს დამოუკიდებლობა მრავალი წლის წინ, მათი შთამომავლები ხელს აწერენ საზეიმოდ ლევილის მამულის დაბრუნების წინასწარ აქტს. მაშინდელმა მთავრობამ ქართველი ხალხის ფულით შეიძინა, შეინახა, მოუფრთხილდა და შემოგვინახა და დღეს ის უბრუნდება ქართველ ხალხს,“ - განაცხადა თეა წულუკიანმა.