სასამართლო ქვეყანაში დამოუკიდებელია და შესაბამისად, გადაწყვეტილება, რომელიც იქნება მიღებული, გახდება ცნობილი, აღნიშნული განცხადება ვიცე-პრემიერმა, ენერგეტიკის მინისტრმა კახა კალაძემ ჟურნალისტებთან ტელეკომპანია „რუსთავი 2“-ის საქმესთან დაკავშირებით გააკეთა.

„დაველოდოთ სასამართლოს გადაწყვეტილებას. მე გამიჭირდება საუბარი და სწორიც არ იქნება ჩემი მხრიდან რაიმე განცხადება გავაკეთო, რადგანაც ჩემი დღევანდელი თანამდებობიდან გამომდინარე, ჩემი განცხადებები შეიძლება აღქმული იქნეს ან ერთი ან მეორე მხარის მიმართ ზეწოლად ან თუნდაც თანადგომად, ამიტომ დაველოდოთ. სასამართლო ქვეყანაში დამოუკიდებელია და შესაბამისად, გადაწყვეტილება, რომელიც იქნება მიღებული, გახდება ცნობილი," განაცხადა კალაძემ.

მისივე თქმით, „რუსთავი 2“-ის საქმესთან დაკავშირებით ხელისუფლება აბსოლუტურად არაფერ შუაში არ არის.

„საქართველოში ის წლები აღარ არის, როდესაც ერთ დღეს იჭერდნენ, ერთ დღეს ასამართლებდნენ და ერთ დღეს გირაოთი ათავისუფლებდნენ. მორჩა, ეს დრო აღარ არის საქართველოში“, - განაცხადა კახა კალაძემ.

ტელეკომპანია „რუსთავის 2“-ის ადვოკატების იმ განცხადების საპასუხოდ კი, რომ სასამართლო საქმის განხილვა დაჩქარებულად მიმდინარეობს, კახა კალაძე ამბობს, რომ პროცესი რამდენიმე თვეა რაც მიმდინარეობს.

„რუსთავი 2“-ის საქმესთან დაკავშირებით, დღეს სააპელაციო სასამართლოში საქმის განხილვა გრძელდება.