მიმაჩნია, რომ [ბიძინა ივანიშვილი] ზედმეტად გავლენის ქვეშ არის მოქცეული დასავლეთის მხრიდან, კერძოდ, ამერიკისგან, - ასე აფასებს დეპუტატი თამაზ მეჭიაური ბიძინა ივანიშვილის მოსაზრებას ნატო-ში საქართველოს გაწევრიანებასთან დაკავშირებით, რომელიც ყოფილმა პრემიერ მინისტრმა გუშინდელ წერილში გააჟღერა.

”მიმაჩნია, რომ ზედმეტად გავლენის ქვეშ არის მოქცეული დასავლეთის მხრიდან, კერძოდ, ამერიკისგან და ამ ილუზიებით აპირებს ”ქართული ოცნება” გააგრძელოს საქმიანობა. ეს ეხება ევროატლანტიკურ არჩევანს, რომლის იმედიც გვქონოდა, თუმცა განვითარებულმა მოვლენებმა საპირისპირო დაგვიმტკიცა და მხოლოდ გამოუსწორებელ ოპტიმისტს შეიძლება ჯეროდეს, რომ საქართველო ნატო-ში გაწევრიანდება”, - განაცხადა მეჭიაურმა და დაამატა:

”მე კატეგორიულად ვერ ვეთანხმები იმ კურსის სისწორეში ბიძინა ივანიშვილს, რომელიც აირჩია ”ქართულმა ოცნებამ”. მიუხედავად იმ წარუმატებული ნაბიჯებისა და არაადეკვატური გამოხმაურებებისა, ჩვენ მაინც ჯიუტად ვაგრძელებთ იმის მტკიცებას, რომ ჩვენ აუცილებლად გავხდებით ნატო-ს წევრი. ბიძინა ივანიშვილი თავისივე განცხადებაში ეწინააღმდეგება ამ რწმენას. ის ამბობს - უახლოეს ხანში ევროკავშირში ჩვენი გაწევრიანება არ იგეგმებაო. ჩვენ ვალდებულებები შევასრულეთ, თუმცა ხან კოსოვოს მიგვაბეს, ხან უკრაინას, ხან თურქეთს და ამ დრომდე არ მომხდარა ვიზალიბერალიზაცია. ბიძინა ივანიშვილს ალბათ უფრო მეტი ინფორმაცია აქვს, რომ მიუხედავად ჩვენს მიერ შესრულებული ვალდებულებებისა, ევროკავშირში ჩვენი მიღების საკითხი არც თუ ისე ახლო მომავალშია დაგეგმილი. ამ ფონზე, როცა გაცილებით მეტი პრობლემები ჰქონდა ნატო-ში გაწევრიანებას ევროკავშირში გაწევრიანებასთან შედარებით, ნატო-სთან მიმართებაში უფრო ოპტიმისტურ განაცხადს აკეთებს ბიძინა ივანიშვილი. თუმცა, მე ვერ ვნახე დასაბუთება, რომელიც ჩემს გადაწყვეტილებაში დამაეჭვებდა”, - განაცხადა მეჭიაურმა.