მსოფლიოს ყველაზე გრძელი და ღრმა სარკინიგზო გვირაბი შვეიცარიაში ოფიციალურად გაიხსნა მას შემდეგ, რაც მისი მშენებლობა თითქმის ორი ათეული წლის განმავლობაში მიმდინარეობდა.

57 კილომეტრის სიგრძის გოტჰარდის გვირაბი, რომელიც მაღალი სიჩქარის მატარებლებისთვის იქნება განკუთვნილი და შვეიცარიის ალპების ქვეშ გადის, ჩრდილოეთ და სამხრეთ ევროპას შორის დამაკავშირებელ მარშრუტს წარმოადგენს. 

შვეიცარიის ხელისუფლების განცხადებით, აღნიშნული გვირაბი ევროპულ სატრანსპორტო სისტემაში ტვირთების გადაზიდვის მხრივ რევოლუციურ ძვრებს გამოიწვევს. საქონელი, რომლის გადაზიდვასაც ამჟამად წელიწადში მილიონი სატვირთო ავტომანქანა ემსახურება, მატარებლებით იქნება გადატანილი.

გვირაბი დღეში დაახლოებით 260 სატვირთო და 65 სამგზავრო მატარებელს გაატარებს. მატარებლები საშუალოდ 250კმ/სთ სიჩქარით იმოძრავებენ.

შვეიცარიის საინჟინრო ტრიუმფი

შვეიცარიელების მიერ აშენებული გვირაბი რამდენიმე კილომეტრით აღემატება იაპონიის სეიკანის სარკინიგზო გვირაბს, სიგრძით 53.9კმ, რომელიც დღემდე ყველაზე გრძელ გვირაბად ითვლებოდა და ასევე უკან იტოვებს 50.5კმ–იან წყალში გამავალ დიდ ბრიტანეთსა და საფრანგეთს შორის დამაკავშირებელ გვირაბს.

გვირაბის გახსნის ოფიციალურ ცერემონიას შვეიცარიის მთავრობის წარმომადგენლებთან ერთად შეუერთდნენ გერმანიის კანცლერი ანგელა მერკელი, საფრანგეთის პრეზიდენტი ფრანსუა ოლანდი და იტალიის პრემიერ მინისტრი მატეო რენზი.

"ეს მხოლოდ ნაწილია შვეიცარიის იდენტობის," განაცხადა ფედერალური სატრანსპორტო ოფისის დირექტორმა პიტერ ფუეგლისტალერმა სააგენტო "როიტერსთან" საუბრისას.

"ჩვენთვის, ალპების დაპყრობა, ჰოლანდიელების მიერ ოკეანეების გამოკვლევის მსგავსი რამაა."

გვირაბი 17 წლის განმავლობაში შენდებოდა.

მისი სიგრძე 57.1კმ–ია

ღირებულება 12 მილიარდ 500 მილიონი აშშ დოლარი (ნიკარაგაუს მთლიანი შიდა პროდუქტის ექვივალენტი)

დასაქმებულთა რაოდენობა – 2 600 ადამიანი

მბურღავი მანქანის სიგრძე – 410 მეტრი

გამოყენებული ბეტონის ოდენობა – 4 მილიონი კუბური მეტრი

სპილენძის კაბელი – 3 200 კილომეტრი, ლონდონიდან ნიუ იორკამდე მანძილის ნახევარზე მეტი.