მისი დაბადების დღიდან მე-2 დღეს კუბას პრეზიდენტმა რაულ კასტრომ ენამოსწრებულად იხუმრა, რომ კასტროები „ჯანმრთელები და დღეგრძელები“ არიან და იგი ადვილად მოახერხებს რამდენიმე 5-წლიანი ვადით ქვეყნის სათავეში ყოფნას, თუმცა მისი დანაპირების ერთგული იქნება და 2018 წელს პრეზიდენტის პოსტიდან წავა. ამის შესახებ „როიტერსი“ წერს.

რაულ კასტრო ერთი ათეული წლის წინათ გახდა პრეზიდენტი და შეცვალა მისი ძმა ფიდელ კასტრო, რომელიც იმ დროისთვის ქვეყნის სათავეში მსოფლიოს ერთ-ერთი ყველაზე ხანგრძლივად მყოფი ლიდერი იყო, რომელმაც ამბოხების გზით ძალაუფლება ხელში 1959 წელს ჩაიგდო და აშშ-ს მიერ მხარდაჭერილი დიქტატორი ჩამოაგდო.

„კასტროები ნამდვილად ვართ ჯანმრთელები და დღეგრძელები. მე პარასკევს 85 წლის გავხდი, რაც ამას ამტკიცებს და შემიძლია მოვახერხო კიდევ რამდენიმე 5-წლიანი ვადით ქვეყნის სათავეში ყოფნა,“ განაცხადა რაულმა ჰავანაში კარიბის ქვეყნების სამიტის გახსნაზე სიტყვით გამოსვლისას, რასაც დამსწრე საზოგადოებაში სიცილი მოჰყვა. სამიტს ვენესუელას პრეზიდენტი ნიკოლას მადუროც ესწრებოდა.

„მაგრამ მე უკვე ვთქვი სხვა ღონისძიებებზე, რომ დავტოვებ პრეზიდენტის თანამდებობას 2018 წლის 24 თებერვალს.“

ფიდელი, რომელიც ამტკიცებს, რომ იგი მისი მკვლელობის 600-სზე მეტ მცდელობას გადაურჩა, რაც ძირითადად შეერთებული შტატების საიდუმლო სამსახურების მიერ იყო მოწყობილი, წელს 90 წლის ხდება.

„მალე 90 წლის ვიქნები. მალე მე ყველა სხვა დანარჩენის მსგავსი ვიქნები. ყველას ჯერი დადგება,“ განაცხადა მან მიმდინარე წლის აპრილში კუბის კომუნისტური პარტიის ყრილობაზე.

რაულ კასტრომ ყრილობამდე წამოაყენა წინადადება, რომ კომუნისტური პარტიის უმაღლესი ოფიციალური პირებისთვის 70-წლიანი ასაკობრივი შეზღუდვა დაწესებულიყო, რითაც გაზარდა იმის მოლოდინი, რომ ვეტერანები განზე გადგომას დაიწყებდნენ.

ამის ნაცვლად კი რაული და მისი 80 წელს გადაცილებული თანამებრძოლი ხოსე რამონ მაჩადო ვენტურა ყრილობაზე პირველ და მეორე მდივნებად აირჩიეს მომდევნო 5 წლის განმავლობაში. ეს კი ნიშნავს იმას, რომ რაულ კასტრო პარტიის ხელმძღვანელად დარჩება პრეზიდენტის პოსტის დატოვების შემთხვევაშიც კი, თუკი იგი თავად არ გადაწყვეტს, რომ პარტიული თანამდებობიდანაც წავიდეს.