აბსოლუტურად ყველაფერს ველოდები, სასამართლო და მოწინააღმდეგე მხარე სრულად შეთანხმებულად იქცევა, ყველაფერი კეთდება იმისთვის, რომ პროცესი რაც შეიძლება სწრაფად წარიმართოს, - განაცხადა ტელეკომპანია „რუსთავი-2“-ის გენერალურმა დირექტორმა, ნიკა გვარამიამ თბილისის სააპელაციო სასამართლოში.

"ეს იმდენად ტრაგიკულია უკვე, რომ სასაცილოც აღარაა, თუმცა ნამდვილად კურიოზულია ფაქტია. ჩვენ, თავისთავად ცხადია ვიბრძოლებთ ბოლომდე, ველოდებით საკონსტიტუციო სასამართლოსაც. ამ კოლეგიამ რაც არ უნდა ქნას, თუ ჩვენი სარჩელები საკონსტიტუციო სასამართლოში დაკმაყოფილდება, წერონ და იკითხონ, ეს ყველაფერი უკან დარჩებათ“, - განაცხადა ნიკა გვარამიამ.

”რუსთავი 2”-ის გენერალურმა დირექტორის თქმით, როგორც სააპელაციო სასამართლოს აღნიშნულ სამ მოსამართლეს, ასევე მოსამართლე ურთმელიძესაც ეკისრებათ პასუხისმგებლობა იმაზე, რომ საქართველოს და ქართველ ერს დააკლდა ვიზა-ლიბერალიზაცია.

„როგორც ჩანს, საქართველოსთვის ვიზალიბერალიზაციის პროცესი გადაიდო შორეულ პერსპექტივაში, ოქტომბერში ჯერჯერობით, მაგრამ ვნახოთ. ნამდვილად არ მეიმედება რომ ეს პროცესები, მათ შორის არჩევნები პოზიტიურად წარიმარტება ჩვენთვის. სასამართლო ხელისუფლება, კონკრეტულად ეს სამი ადამიანი ვინც ახლა პროცესზეა, ვითომ მოსამართლის მანტიებით, მოსამართლე ურთმელიძე არიან სრულად პასუხისმგებლები იმაზე, რაც ქართველ ერს დააკლდა. კერძოდ, ვიზალიბერალიზაციის დანაკლისზე, ეს ადამიანები ამ პასუხისმგებლობას ვერასდროს ვერ გაექცევიან, მათ შორის სამართლებრივ პასუხიმგებლობაზეც ვსაუბრობ“, - განაცხადა ნიკა გვარამიამ.

სააპელაციო სასამართლოში "რუსთავი-2"-ის საქმის განხილვაზე დღეს ნიკა გვარამია და ტელეკომპანიის ადვოკატები არ დაუშვეს.