ბიძინა ივანიშვილი აცხადებს, რომ 70%-იანი ალბათობით, საქართველო ვიზა–ლიბერალიზაციას ახლა მიიღებს, თუმცა 100%-იანი ალბათობით, ეს წლის ბოლოს მოხდება. აღნიშნული განცხადება მან ჟურნალისტებთან საქართველოში ევროკავშირის ელჩ იანოშ ჰერმანზე დაყრდნობით გააკეთა.

„მე ვფიქრობ, არადამსახურებულად საქართველო მოექცა ბევრი იმ პრობლემის ცენტრში, რაც ევროპას ბოლო დროს გადახდა. თურქეთს და კოსოვოსაც უნდა ვიზალიბერალიზაცია. საქართველომ განუხრელად შეასრულა ყველა პუნქტი, რომ მიიღოს ვიზალიბერალიზაცია. აქაც უნდა მოვითმინოთ, ვერ მივიღებთ უახლოეს დროში, მივიღებთ სექტემბერში, მაგრამ მოლოდინი უნდა დაგვრჩეს და ხელისუფლებამ ყველაფერი გააკეთოს იმისთვის, იქნებ როგორმე მოხერხდეს უახლოეს დროში ვიზა–ლიბელარიზაციის მიღება. ევროკავშირის ელჩთან მქონდა შეხვედრა ერთი თვის წინ. თუ გნებავთ მის სიტყვებასაც გეტყვით, 70%-იანი ალბათობით შეგვიძლია ახლა მივიღოთ, მაგრამ 100%–იანი ალბათობით მივიღებთ წლის ბოლოს“, - განაცხადა ბიძინა ივანიშვილმა. მან დასძინა, რომ ეს არა საქართველოს მთავრობის, არამედ ევროპის შიგნით არსებული პრობლემებით არის გამოწვეული.