ქობულეთის მუნიციპალიტეტის მხარდაჭერით ორგანიზაცია „ახალგაზრდა ადვოკატები“ პროექტის: „ქობულეთი - ტოლერანტობის ქალაქი“ განხორციელებას იწყებს, რომელში მონაწილეობაც ზოგადსაგანმანათლებლო დაწესებულებების IX-XII კლასის მოსწავლეებს შეეძლებათ.

გამგეობის ადმინისტრაციული შენობის სააქტო დარბაზში პროექტის პრეზენტაცია გაიმართა და ანალიტიკური თემების სერთიფიცირებული კონკურსი გამოცხადდა. საკონკურსო თემებად „მე ვარ საქართველოს მოქალაქე“ და „ჩემი ტოლერანტული ქალაქი“ განისაზღვრა. თემების მიღება ელექტრონულად (pryoungbarristers@yahoo.com) 17 ივნისამდე გაგრძელდება. კონკურსში გამარჯვებულებს ფულადი ჯილდო გადაეცემათ.

პროექტის მიზანია, ტოლერანტული ქალაქის ახალი თაობა მუდმივად გრძნობდეს სამოქალაქო პასუხისმგებლობას, როცა არსებობს თანამედროვე დროის ახალი გამოწვევები, როგორც გამოხატვის, ასევე რელიგიის თავისუფლების მიმართულებით, რათა გაძლიერდეს ტრადიციებზე დაფუძნებული ურთიერთობები. პროექტის ყველა აქტივობა მიმართული იქნება საერთო სამოქალაქო პასუხისმგებლობის შექმნისკენ. ერთი თვის მანძილზე, ქობულეთის ტრადიციულ ტოლერანტობას შეაფასებს ადგილობრივი ახალი თაობა, საჯარო სივრცეში, პროექტის გულშემატკივარი და თანამონაწილე გახდება, ფაქტობრივად ქალაქში ყველა დაინტერესებული ადამიანი, რაც ხელს შეუწყობს ადგილზე თობათა შორის კომუნიკაციას და საჭირო თანამშრომლობის განვითარებას.

შეხვედრაზე ასევე ისაუბრეს სამომავლო გეგმებსა და ინიციატივებზე. პროექტის ფარგლებში დადგა ინიციატივა ქობულეთში ტოლერანტობის ქუჩის გახსნის თაობაზე.

პროექტის შესახებ დაწვრილებითი ინფორმაცია შეგიძლიათ იხილოთ „ახალგაზრდა ადვოკატების“ ოფიციალურ ვებ-გვერდზე - www.barristers.ge

პროექტი საზეიმოდ ქობულეთში 25 ივნისს დაიხურება.