„დემოკრატიული მოძრაობის“ თავმჯდომარის, ნინო ბურჯანაძის განცხადებით, „ნაციონალური მოძრაობის“ ძალიან ცუდი ტრადიცია  დღევანდელმა ხელისუფლებამ გააგრძელა.

აღნიშნულით ბურჯანაძე „რუსთავი 2“-ის საქმესთან დაკავშირებით, სააპელაციო სასამართლოს მიერ მიღებულ გადაწყვეტილებას ეხმაურება და აღნიშნავს, რომ „რუსთავი 2“-ის წინააღმდეგ პოლიტიკური პროცესი მიმდინარეობს.

„ჩემთვის სრულიად ნათელია, რომ დღეს რაც სასამართლოში ხდება, ეს რა თქმა უნდა, არის პოლიტიკური პროცესი „რუსთავი 2“-ის წინააღმდეგ. არჩევნების წინ, ის რეალობა, რაც დგება „რუსთავი 2“-თან მიმართებაში, რაც დგება ჩვენს პარტიასთან მიმართებაში, როცა თავისუფალ საეთერო დროს გვართმევენ, ნიშნავს, რომ ეს არჩევნები ნამდვილად ვერ იქნება დემოკრატიულ და სამართლიან არჩევნებად გამოცხადებული“, - განაცხადა ნინო ბურჯანაძემ.

თბილისის სააპელაციო სასამართლომ “რუსთავი-2”-ის საქმეზე პირველი ინსტანციის გადაწყვეტილება ძალაში დატოვა, რომლის მიხედვითაც „რუსთავი 2“-ის წილის 60% – ქიბარ ხალვაშს, 40% კი – კომპანია „პანორამას“ უნდა გადაეცეს.