„ქალბატონ ნაზღაიძეს ე.წ. სამწლიანი გამოსაცდელი ვადა გასდის ნოემბერში, ის შემსრულებელია ამ ყველაფრის იმ მოტივით, რომ ჰგონია ისევ დანიშნავენ, თუმცა, ვპირდებით რომ მოსამართლედ ვერასდროს ვეღარ განმწესდება“ - აღნიშნული განცხადება „რუსთავი-2“-ის გენერალურმა დირექტორმა, ნიკა გვარიამიამ საგანგებოდ გამართულ ბრიფინგზე გააკეთა.

„მთელი ის კრიტიკა, რომელსაც არასამთავრობო სექტორი, საერთაშორისო ექსპერტები ამბობდნენ გამოსაცდელ ვადასთან დაკავშირებით, რომ ამის შედეგად ჩვენ მივიღებდით მართულ მოსამართლეებს, „რუსთავი-2“-ის საქმემ და ქალბატონი ნაზღაიძის გადაწყვეტილებამ კიდევ ერთხელ დაადასტურა და დაამტკიცა. მოკლედ და კონკრეტულად, ჩვენ მივიღეთ ის შედეგი, რომელიც ასე მოსალოდნელი იყო.

არავისთვის გასაკვირი არ ყოფილა ის, რაც მოხდა. რომ არ დაგიმალოთ ველოდი გაცილებით უარესს, არ დავიწყებ იმის დაკონკრეტებას რას ველოდი იმდენად რამდენადაც არ მინდა, რომ დავეხმარო რჩევებით არც თუ ისე გონიერ სასამართლო ხელისუფლებას და იმ ადამიანებს ვინც წარმართავს სასამართლო ხელისუფლებას, კერძოდ, არც თუ ისე ჭკუაგამართულ ქალბატონ წულუკიანს და კიდევ სხვა პატრონებს სასამართლოსას. სამწუხაროდ, სასამართლოს დაეპატრონა ხელისუფლება სრულად, ის ბატონი ივანიშვილის დავალებების შემსრულებელია. ის, რაც დღეს ჩვენ ვნახეთ შეუნიღბავი კატასტროფა იყო“ - აღნიშნა ნიკა გვარამიამ.

თბილისის სააპელაციო სასამართლომ ”რუსთავი-2”-ის საქმეზე პირველი ინსტანციის გადაწყვეტილება ძალაში დატოვა. სამაუწყებლო კომპანიის ადვოკატები, დიმიტრი საძაგლიშვილი და თამთა მურადაშვილი საქალაქო სასამართლოს მოსამართლის თამაზ ურთმელიძის მიერ 2015 წლის 3 ნოემბერს მიღებული გადაწყვეტილების გაუქმებას და საქმის პირველ ინსტანციაში დაბრუნებას ითხოვდნენ.

ადვოკატებმა ასევე დააყენეს მოსამართლე, შორენა ყაველაშვილის აცილების შუამდგომლობა, თუმცა მოსამართლეთა კოლეგიას ეს შუამდგომლობა არ განუხილავს და მხოლოდ განაჩენი გამოაცხადა.

ადვოკატები სააპელაციო სასამართლოს გადაწყვეტილების გასაჩივრებას უზენაეს სასამართლოში აპირებენ.