„რუსთავი-2“-ის საქმესთან დაკავშირებით მიღებული გადაწყვეტილების სამოტივაციო ნაწილს აუცილებლად გამოვითხოვ სასამართლოდან“ - აღნიშნული განცხადება guardian.ge-სთან საუბრისას "ეროვნული ფორუმის" დეპუტატმა, ანი მიროტაძემ გააკეთა.

მისი განცხადებით, თუ ერთი მხრივ, მედია უნდა იყოს ხელშეუხებელი, მეორე მხრივ, ყველას აქვს უფლება კერძო საკუთრებისთვის სასამართლოში იდავოს.

„ზოგადად, რაც უკავშირდება მედიას, ეს არის ჩემთვის განსაკუთრებული საქმე. არ აქვს მნიშვნელობა რომელი კონკრეტული არხია. ცალსახად, გამოყოფილად არ ვსაუბრობ ხოლმე. თუ მედიის რომელიმე საშუალებას პრობლემები აქვს, ის არის ჩემი განსაკუთრებული ყურადღების ქვეშ.

რუსთავი-2“-თან დაკავშირებით გადაწყვეტილება მე, რა თქმა უნდა, მოვისმინე. მაქვს კითხვები, მაგრამ ვიდრე ვიტყვი რომ ეს არის პოლიტიკური საქმე, ან რაღაც კავშირში პოლიტიკურ საქმესთან, ძალიან მინდა ვნახო გადაწყვეტილების სამოტივაციო ნაწილი, რომ ვნახო რის საფუძველზე გამოიტანა სასამართლომ ეს გადაწყვეტილება.

როდესაც რომელიმე მედიასაშუალებას აქვს მსგავსი ტიპის პრობლემები, ეს რა თქმა უნდა, კარგი არ არის. ცალსახაა, რომ ეს კარგი არ არის და აჩენს კითხვებს, კითხვას სჭირდება პასუხი. თუ პასუხი არ გაეცემა კითხვებს, ეს ბევრი ვერსიის წარმოშობას გამოიწვევს“,- აღნიშნავს "ეროვნული ფორუმის“ დეპუტატი.

მიროტაძის განცხადებით, ქიბარ ხალვაშს აქვს უფლება იდავოს საკუთრებისთვის, თუმცა, ამის მიუხედავად, მიაჩნია, რომ როდესაც ქვეყანა წინასაარჩევნო კამპანიის გამო განსაკუთრებულ რეჟიმზეა გადასული, არ არის სასურველი დავის არსებობა „თუნდაც იმიტომ, რომ საქმეს არ მიეკეროს პოლიტიკურად მოტივირებულის სახელწოდება“.

„ორი მესაკუთრე დავობს ერთმანეთთან, ვერავინ ვერ აუკრძალავს ქიბარ ხალვაშს რომ ამის გამო იდავოს. სხვა საკითხია, როგორ მოიპოვა მან „რუსთავი-2“-ის მფლობელობა, მაგრამ ხომ ვიცით, რომ ის არის მფლობელი, ფაქტია ეს. უმჯობესი იქნებოდა, რომ წინასაარჩევნო პერიოდში ეს გაუგებრობა არ მომხდარიყო - თუ ეს მხოლოდ გაუგებრობაა“, - განუცხადა მიროტაძემ guardian.ge-ს და დაამატა, რომ დემოკრატიული მედიის არსებობა და სიტყვის თავისუფლება ქვეყანაში არის ერთ-ერთი განმსაზღვრელი ფაქტორი პროცესების დემოკრატიულად განვითარების.