საფრანგეთის ეროვნული ავიახაზების მფრინავებმა 4-დღიანი გაფიცვა გამოაცხადეს, რამაც ევრო 2016 -ის ჩემპიონატზე დასწრების მსურველი ფეხბურთის ათასობით გულშემატკივრის გეგმებს შესაძლოა ხელი შეუშალოს.

„ეარ ფრანსმა“ შაბათს ფრენების 30% გააუქმა, მაგრამ კომპანიამ განაცხადა, რომ ის იმ ქალაქების მიმართულებით, სადაც საფეხბურთო შეხვედრები იმართება, ფრენების პრიორიტიზირებას მოახდენს.

მფრინავების პროფკავშირები მთავრობისაგან დასაქმებულთა შესახებ მიღებული იმ ახალი კანონის გაუქმებას მოითხოვენ, რომელიც ადამიანების სამსახურში აყვანას და გაშვებას აადვილებს.

მფრინავების აქცია ერთ-ერთია იმათგან, რასაც საფრანგეთში ახლახან ჰქონდა და ჯერ კიდევ აქვს ადგილი. მაგალითად დასუფთავების სამსახურის გაფიცვის გამო, ოთხშაბათამდე პარიზში ნაგვის გატანა შეჩერებული იქნება, ხოლო გასული თვის ბოლოს ბენზო-გასამართ სადგურებზე საწვავი არ იყიდებოდა, რადგან პროტესტანტებმა ნავთობის ქარხნების ბლოკირება განახორციელეს.

პრეზიდენტმა ფრანსუა ოლანდმა მოუწოდა პროფკავშირებს, ევროპის ჩემპიონატისთვს ხელისშეშლა არ დაუშვან.

„ეარ ფრანსის“ ხელმძღვანელობის თქმით, გაფიცვა კომპანიას დღეში 5 მილიონი ევრო დაუჯდება.

მოელიან, რომ საფრანგეთის 10 ქალაქს ევროპის ჩემპიონატის დროს 7 მილიონი ადამიანი ესტუმრება.