საქართველოს იუსტიციის მინისტრის, თეა წულუკიანის განცხადებით,  ყოფილი პრემიერის, ვანო მერაბიშვილის საქმე არის ერთი ჩვეულებრივი პატიმრის საქმე, ამიტომ მან არ ჩათვალა საჭიროდ ზეპირი განხილვის მოთხოვნა.

ამის შესახებ წულუკიანმა მთავრობის სხდომის დასრულების შემდეგ ჟურნალისტებს განუცხადა.

„ჩვენ არ ჩაგვითვლია, რომ ვანო მერაბიშვილის საქმე არის რაიმე არაჩვეულებრივი, ან ისეთი ექსტრაორდინალური, რომელიც მოითხოვდა ზეპირი განხილვის მოთხოვნას სტრასბურგში... ეს არის ერთი რიგითი პატიმრის რიგითი საჩივარი, ამიტომ მე არ მომითხოვია ზეპირი განხილვა, ეს იქნებოდა რესურსის ზედმეტი ხარჯვა“,- განაცხადა იუსტიციის მინისტრმა.

თეა წულუკიანის თქმით, როგორიც არ უნდა იყოს სტრასბურგის სასამართლოს გადაწყვეტილება, ის მერაბიშვილთან დაკავშირებით უკვე გამოტანილ განაჩენს ვერ შეცვლის.

„ხვალ გამოდის გადაწყვეტილება, მაგრამ რაც არ უნდა იყოს ბატონი ვანო მერაბიშვილი, როგორც სხვა პატიმრები, ახლა უკვე აღარ არიან წინასწარ პატიმრობაში, ისინი იხდიან სასჯელს და კონკრეტულად ბატონი ივანე მერაბიშვილის შემთხვევაში არ იგეგმება მისი ვადამდე ადრე გათავისუფლება. აქედან გამომდინარე, ამაზე ხვალინდელი გადაწყვეტილება როგორიც არ უნდა იყოს ის, რა თქმა უნდა, ვერ იმოქმედებს“,-განაცხადა თეა წულუკიანმა.

სტრასბურგის სასამართლო,  14 ივნისს, ვანო მერაბიშვილთან დაკავშირებით სასამართლო გადაწყვეტილებას სასამართლოს ოფიციალურ ვებ-გვერდზე გამოაქვეყნებს. სტრასბურგის სასამართლო საქართველოს ყოფილი პრემიერ-მინისტრის „ვანო მერაბიშვილი საქართველოს წინააღმდეგ“ შეტანილ სარჩელსაც განიხილავს.