"დემოკრატიული მოძრაობის“ თავმჯდომარე ნინო ბურჯანაძემ პარტიის მთავარი საბჭოს წევრებთან ერთად 13 ივნისის სტიქიის დროს გარდაცვლილი ადამიანების ხსოვნის მემორიალი გვირგვინით შეამკო.

”პირველ ყოვლისა, მინდა მივუსამძიმრო იმ ადამიანების ოჯახებს, ვინც ამ საშინელ ტრაგედიას შეეწირა. ძალიან მძიმეა საუბარი, აქ იმყოფება სრულიად ახალგაზრდა გოგონა, რომელიც ამ ტრაგედიის გამო დაქვრივდა. არიან მშობლები, რომლებმაც შვილი დაკარგეს. დღევანდელი დღე ძალიან მძიმეა მათთვის, ბუნებრივია, ეს არის სრულიად გამოუსწორებელი ტრაგედია და ჩვენც ყველას გვახსოვს ეს დიდი განსაცდელი, როდესაც იმ ვითარებაში შეიძლებოდა ადამიანები არ დაღუპულიყვნენ, სრულიად უდანაშაულო ადამიანები დაიღუპნენ. მე რა თქმა უნდა, არ შემიძლია კვლავ არ დავაფიქსირო ჩემი აღშფოთება ხელისუფლების იმ უუნარობის გამო, რომელიც შარშან ვიხილეთ.

პრაქტიკულად ის, რომ ადამიანები არ იყვნენ წინასწარ გაფრთხილებულნი მოსალოდნელი საფრთხის შესახებ, არ იქნა ზომები დროულად მიღებული, გახდა კიდევაც ადამიანების დაღუპვის მიზეზი. მე არ ვარ დარწმუნებული არც იმაში, რომ ღმერთმა დაიფაროს და ანალოგიური რამ კიდევ განმეორდეს, მოსახლეობა დაცულია და ის ტრაგიკული შეცდომები, რაც იყო გასულ წელს დაშვებული, არ განმეორდება. მე ვერ ვხედავ ხელისუფლების უნარს, მოაგვაროს ელემენტარული პრობლემები და უზრუნველყოს ჩვენი მოსახლეობის უსაფრთხოება, უზრუნველყოს ჩვენი მოსახლეობის ინტერესების დაცვა. ყველაზე სამწუხარო არის ეს, რასაც შემდეგ ადამიანების სიცოცხლე, ჯანრთელობა და ნერვები ეწირება“, - განაცხადა ნინო ბურჯანაძემ.