თბილისის მერის, დავით ნარმანიას განცხადებით,  ის საქმის კურსშია  საკრებულოს იურიდიულ საკითხთა კომისიის თავმჯდომარის, თედო კობახიძის მიმართ გაჟღერებულ ბრალდებებთან დაკავშირებით.

მისი თქმით, აღნიშნულ საკითხზე აუცილებელია დაიწყოს გამოძიება.

„ვნახე მე თავადაც სიუჟეტი და ვფიქრობ, გარკვეული საკითხები დამატებით უნდა იქნას შესწავლილი და გამოკვლეული შესაბამისი ორგანოების მხრიდან. უმჯობესია ამასთან დაკავშირებით შემდგომ გაკეთდეს კომენტარი“, - განაცხადა ნარმანიამ.

რაც შეეხება ოპოზიციის მოთხოვნას, რომლის მიხედვითაც საქმის გამოძიებამდე თედო კობახიძის პოლიტიკური პასუხისმგებლობის საკითხი უნდა დადგეს,  დავით ნარმანია აცხადებს, რომ ამ საკითხს სამართლებრივად შესწავლა სჭირდება.  

გუშინ გადაცემა P.S.-ში სიუჟეტი გავიდა, სადაც პარლამენტის ვიცე-სპიკერის, მანანა კობახიძის ძმა თედო კობახიძე საკრებულოს ყოფილმა თანამშრომელმა, ბადრი ჯავახიშვილმა ფულის გამოძალვაში დაადანაშაულა.

ჯავახიშვილის განცხადებით, თედო კობახიძემ მას პარტია „ქართულ ოცნებაში“ მუშაობა ადგილობრივი არჩევნების წინ დააწყებინა, თუმცა პირველივე ხელფასის აღების შემდეგ, გასამრჯელოდან წილი მოსთხოვა. ჯავახიშვილი ამტკიცებს, რომ ყველა ის პირი, ვინც პარტიაში თედო კობახიძემ დაასაქმა, ვალდებული იყო მისთვის ხელფასის ნაწილი მიეცა.

სიუჟეტის თანახმად, ამ ისტორიას გაგრძელება უკვე თბილისის საკრებულოში მოჰყვა. არჩევნების შემდეგ, თედო კობახიძემ ბადრი ჯავახიშვილი საკრებულოში დაასაქმა. სანაცვლოდ ჯავახიშვილის ყოველი თვის ხელფასიდან 35% თედო კობახიძის საბანკო ანგარიშზე უნდა ჩაერიცხა.

თავად თედო კობახიძე ჯავახიშვილის მიერ გავრცელებულ ინფორმაციას სიცრუეს უწოდებს.