საქართველოს კათოლიკოს - პატრიარქმა, ილია მეორემ ვაკე-საბურთალოს გზაზე, 13 ივნისს დაღუპულთა ხსოვნის მემორიალთან პანაშვიდი გადაიხადა.

პანაშვიდს საქართველოს პრემიერ-მინისტრი გიორგი კვირიკაშვილიც დაესწრო.

როგორც მან ჟურნალისტებთან საუბრისას განაცხადა, უმთავრესი არის ის, რომ 13 ივნისის სტიქიის შემდეგ იყო უდიდესი კონსოლიდაცია. მისი თქმით, ამ დღეს მთელი ერი გაერთიანდა.

„ზუსტად 1 წელი გავიდა იმ ტრაგედიიდან, რომელიც ზუსტად ამ დროს თბილისში დატრიალდა და რასაც 21 ადამიანის სიცოცხლე შეეწირა.  დღეს მოვედით, რომ პატივი მივაგოთ ამ ადამიანების ხსოვნას. ჩვენთვის, ჩვენი ქვეყნისთვის ძალიან დიდი დანაკარგია, როდესაც ამდენი ახალგაზრდა ეწირება ბუნებრივ კატაკლიზმას, რომელიც გამოიწვია მეწყერმა, წყალდიდობამ და ყველაფერმა ერთად.

იყო უდიდესი თანაგრძნობა მთელი ერის ახალგაზრდების მხრიდან გამოხატული, რომლებიც ღამეებს ათენებდნენ იმისთვის, რათა გაეწმინდათ მიდამოები. რამდენიმე პრეცედენტი მახსენდება ასეთი. ეს იყო 9 აპრილის შემდეგ, როდესაც გაერთიანდნენ და ერთ მუშტად იყო შეკრული მთელი ერი და ეს იყო 13 ივნისის ტრაგედია“, - განაცხადა გიორგი კვირიკაშვილმა.