„მრეწველთა“ ლიდერი, გოგი თოფაძე ყოფილი პრემიერ-მინისტრის, ბიძინა ივანიშვილის მიერ კოალიციურ მთავრობასთან დაკავშირებით გაკეთებულ განცხადებას ეხმაურება და იწონებს.

„ბიძინა ივანიშვილი საუბრობს, რომ მისი პარტია არჩევნებში ისეთ შედეგს მიიღებს, რომ არ დასჭირდება კოალიციური დახმარება“ - განუცხადა guardian.ge-ს თოფაძემ.

მისი შეფასებით, ყველა ევროპულ დემოკრატიულ ქვეყანაში ასე ხდება და აღნიშნული ნორმალური პოლიტიკური პროცესია.

„ეს ივანიშვილის აზრია და სწორი აზრია. უნდა გაიმარჯვოს რაღაც პარტიამ, რომელიც შემდგომ ჩამოაყალიბებს თავის მთავრობას. შეიძლება გაიმარჯვოს 6-7 პარტიამ, თუმცა, აქედან მხოლოდ ერთმა შეძლოს ისეთი რაოდენობა შეიყვანოს პარლამენტში, რომ კოალიციური მთავრობა აღარ იყოს საჭირო. სწორედ ეს არის მისი გამოსვლის ლეიტმოტივი“ - აღნიშნა თოფაძემ.

ყოფილმა პრემიერმა, ბიძინა ივანიშვილმა ბეჭდური და ონლაინ-მედიის წარმომადგენლებთან შეხვედრისას განაცხადა, რომ კოალიციური მთავრობა პრობლემა იქნება ქვეყნისთვის.

„ახალ პირობებში და ახალ არჩევნებზე თუ 80 ხმაზე ნაკლებს მიიღებს "ქართული ოცნება" ეკონომიკური რეფორმების გატარება გაძნელდება. თუ ისევ შედგა კოალიციური მთავრობა, ძალიან ბევრ ახალ პრობლემას მივიღებთ. ასეთი მთავრობები ძირითადად რესურსების განაწილებაში არიან სათავისოდ და სერიოზული რეფორმები რჩება უყურადღებოდ, თუმცა, მე კოალიციური მთავრობის წინააღმდეგი არ ვარ. მაგრამ, ასეთი ეკონომიკის და მცირე დაფინანსების პირობებში როგორშიც ჩვენ ვართ, ძალიან რთული იქნება და შეუშლის ხელს საქართველოს სწორი მიმართულებით განვითარებას....“ - აღნიშნა ივანიშვილმა.