არასაპარლამენტო ოპოზიცია პრეზიდენტ გიორგი მარგველაშვილს საარჩევნო კოდექსში ცვლილებების შეტანის შემთხვევაში, კანონზე ვეტოს დადებისკენ მოუწოდებს.

„ახალი კანონის ამოქმედების შემდგომ ექნებათ 10%-ზე უფრო ნაკლები, როგორც პატრიოტთა ალიანსს და მთლიანად მის ბლოკს - „გაერთიანებული ოპოზიცია“, ასევე „ლეიბორისტებსაც“ და ბურჯანაძის პარტიასაც. ჩვენ მივმართავთ პრეზიდენტს, რომ ვეტო დაადოს საარჩევნო კოდექსში შეტანილ ამ ცვლილებებს“,- განაცხადა „თავისუფალი საქართველოს“ ლიდერმა, კახა კუკავამ.

ოპოზიციის ნაწილი კი კანონის იმ ნორმას აპროტესტებს, რომელიც პარტიებისთვის წინასაარჩევნოდ სარეკლამო დროის გადანაწილებას ეხება.

საქართველოს პატრიოტთა ალიანსის პოლიტიკური მდივნის გოჩა თევდორაძის თქმით, მათ მმართველ გუნდს, კოალიცია „ქართული ოცნებიდან“ გასული პოლიტიკური სუბიექტებისთვის, სარეკლამო დროის გამოყოფა კოალიციის კუთვნილი დროიდან შესთავაზეს.

„ჩვენ შევთავაზეთ პარლამენტს და „ქართულ ოცნებას“, მასში შემავალ პოლიტიკურ პარტიებთან ერთად „ქართული ოცნების“ კოალიციისთვის რა უფასო სარეკლამო დროც იყო მიცემული, იმ დროის მონაკვეთებიდან მომხდარიყო განაწილება იმ პოლიტიკურ ძალებზე, რომლებიც მას გამოეყვნენ. წინააღმდეგ შემთხვევაში ჩვენ გვიტოვებენ ერთს, რომ საკონსტიტუციო სასამართლოს მივმართოთ“,- აღნიშნა გოჩა თევდორაძემ.