„საქართველომ სამწუხაროდ თავის დროზე დაკარგა სტრატეგიული შანსი გამხდარიყო ნატო-ს წევრი, ეს მნიშვნელოვანწილად დასავლეთის და ასევე ყოფილი ხელისუფალის, მიხეილ სააკაშვილის დამსახურებაა“,-განაცხადა  პარტია „დემოკრატიული მოძრაობის“ ლიდერმა, ნინო ბურჯანაძემ.

ამის შესახებ მან დღეს გამართულ პრესკონფერენციაზე ისაუბრა.

„2008 წლის აგვისტოს შემდეგ არა ერთხელ გამიკეთებია ის განცხადებები, რომელზეც დღეს კიდევ ერთხელ მინდა გავამახვილო ყურადღება, ლაპარაკია საქართველოს ე.წ. ნატო-ში გაწევრიანებაზე და ევროკავშირის წევრობაზე ან ვიზა ლიბერალიზაციის საკითხზე. გუშინ ჩვენ მოვისმინეთ ამერიკის შეერთებული შტატების კონგრესის ერთ-ერთი წევრის, ნიუ-იორკის წარმომადგენლის და ამერიკის შეერთებული შტატების ყოფილი ელჩის რუსეთში მაიკლ მაკფოლის განცხადებები, იმასთან დაკავშირებით, რასაც მე ვამბობდი, რომ საქართველომ სამწუხაროდ თავის დროზე დაკარგა სტრატეგიული შანსი გამხდარიყო ნატო-ს წევრი, ეს მნიშვნელოვანწილად დასავლეთის და ასევე ყოფილი ხელისუფალის, მიხეილ სააკაშვილის დამსახურებაა. დღეს ჩვენს ქვეყანას ეს შანსი პრაქტიკულად აღარ აქვს“, - განაცხადა ნინო ბურჯანაძემ.

მისი თქმით, ქართველი ცალკეული პოლიტიკოსები დაშტამპულად აზროვნებენ და ძალიან კონკრეტულ დავალებას ასრულებენ.

„ასევე მოვისმინეთ ქალბატონი მერკელის განცხადებები იმასთან დაკავშირებით, რომ ძალიან მნიშვნელოვანია რუსეთთან საქართველოს ურთიერთობების დარეგულირება და გერმანია მიესალმება საქართველოს რუსეთთან ურთიერთობების დაახლოებისა და გაუმჯობესების პროცესს. მე ახლა მაინტერესებს ვკითხო იმ ადამიანებს ქართულ პოლიტიკურ სპექტრში და არა მარტო პოლიტიკურ სპექტრში, რომლებიც ზუსტად ანალოგიური განცხადებებისთვის მე პრორუსულობას მაბრალებენ: როგორ არის საქმე, ბატონი მაიკლ მაკფოლი ნიუ-იორკის შტატის წარმომადგენელი კონგრესში, ქალბატონი მერკელიც პრორუსულები არიან თუ რამე შეიცვალა თქვენს მოსაზრებაში?! თუმცა ეჭვი მაქვს, რომ არაფერი ქართველი ცალკეული პოლიტიკოსების მოსაზრებებში არ შეცვლილა, იმიტომ, რომ ისინი აზროვნებენ დაშტამპული აზროვნებით და ძალიან კონკრეტულ დავალებას ასრულებენ“, -განაცხადა ნინო ბურჯანაძემ.