ადამიანის უფლებათა ევროპული სასამართლოს დელეგაციამ ჩვენება ჩამოართვა მოწმეთა ჯგუფს, საქმეზე „რუსეთი საქართველოს წინააღმდეგ“ (საჩივარი no. 38263/08).
დელეგაცია შედგებოდა შვიდი მოსამართლისგან, რომელთა შორის იყვნენ მირიანა ლაზაროვა-ტრაიკოვსკა („ყოფილი იუგოსლავიის რესპუბლიკა მაკედონია“), ნონა წოწორია (საქართველო), ვინსენტ დე გაეტანო (მალტა), ჰელენ კელერი (შვეიცარია), დმიტრი დედოვი (რუსეთის ფედერაცია), ჯონ ფრიდრიკ კიორბო (დანია) და იონკო გროზევი (ბულგარეთი).

სასამართლომ მოისმინა 33 მოწმის ჩვენება: 16 მათგანი გამოძახებული იყო საქართველოს მთავრობის მიერ, 11 - რუსეთის ფედერაციის მთავრობის მიერ, ხოლო 6 მოწმე უშუალოდ სასამართლოს მიერ იყო მოწვეული.

საჩივარი სასამართლოში 2008 წლის 11 აგვისტოს ადამიანის უფლებათა დაცვის ევროპული კონვენციის 33-ე მუხლის (სახელმწიფოთაშორისი საჩივრები) საფუძველზე შევიდა.

იგი ეხება საქართველოსა და რუსეთის ფედერაციას შორის 2008 წლის აგვისტოში მიმდინარე შეიარაღებულ კონფლიქტსა და მის შემდგომ პერიოდს.

საჩივარი ეყრდნობა კონვენციის მე-2 (სიცოცხლის უფლება), მე-3 (წამების, არაადამიანური და დამამცირებელი მოპყრობის აკრძალვა), მე-5 (თავისუფლებისა და უსაფრთხოების უფლება), მე-8 (პირადი და ოჯახური ცხოვრების დაცულობის უფლება) და მე-13 (სამართლებრივი დაცვის ქმედითი საშუალების უფლება) მუხლებს, პირველი ოქმის 1-ელ და მე-2 მუხლებს (საკუთრების დაცვა და განათლების უფლება) და მეოთხე ოქმის მე-2 მუხლს (გადაადგილების თავისუფლება).

2011 წლის 22 სექტემბრის სასამართლო მოსმენის შემდეგ, 2011 წლის 13 დეკემბერს პალატამ საჩივარი დასაშვებად ცნო, საქმის არსებითი მხარის წინასწარი შეფასების გარეშე.

2012 წლის 3 აპრილს პალატამ საჩივარი განსახილველად დიდ პალატას გადასცა.

მოწმეთა დაკითხვა სტრასბურგში 2016 წლის 6 ივნისიდან მიმდინარეობდა. სტრასბურგის სასამართლოს ინფორმაციით, აღნიშნულთან დაკავშირებით, საქმის განხილვა გრძელდება.