საქართველოსთვის უვიზო რეჟიმის დაწესების საკითხზე, ევროკავშირის საგარეო საქმეთა მინისტრები დღეს ლუქსემბურგში იკრიბებიან.

ვიზების ლიბერალიზაციის საკითხზე ეს უკვე მეხუთე შეხვედრაა, აქედან სამი ევროკავშირის მუდმივი წამომადგენლების დონეზე ჩატარდა, ერთი კი შინაგან საქმეთა და იუსტიციის მინისტრებმა გამართეს.

ბოლო მონაცემებით, საქართველოს ვიზა-ლიბერალიზაციას ევროპარლამენტი კენჭს სექტემბერში უყრის. უვიზო რეჟიმთან ერთად, მსჯელობა ე.წ. შეჩერების მექანიზმის შემოღებაზეც გაგრძელდება.

ევროპარლამენტარები აღნიშნავენ, რომ საქართველომ დაიმსახურა უვიზო რეჟიმი და საკითხის სექტემბერში გადატანა, ევროკავშირის იმიჯს დააზიანებს.

„სექტემბერში, სტრასბურგში სესიაზე საკითხის კენჭისყრაზე გატანა იქნება საქართველოსთვის საუკეთესო სცენარი. ყველაზე ცუდი სცენარი კი ოქტომბერში. მიგრაციის პრობლემებისა და დროებითი შეჩერების მექანიზმზე მსჯელობა პარლამენტს პარალელურ რეჟიმში უწევს.... უვიზო რეჟიმი არ არის საჩუქარი ქართველი ხალხისთვის, უვიზო რეჟიმი სჭირდება საქართველოს მოსახლეობას, თავისუფალი მიმოსვლა სჭირდებათ ოკუპირებულ ტერიტორტიებზე მცხოვრებ ადამიანებსაც. ყველა ვინც საქართველოში ცხოვრობს, მიესალმება ამ გადაწყვეტილებას. საქართველომ შეასრულა ყველა მოთხოვნა და რატომ უნდა დავაკავშიროთ საქართველო სხვა ქვეყნებთან. საქართველომ გააკეთა ძალიან ბევრი რამ და ამის შემდეგ წესების შეცვლა იქნება არასწორი და არასამართლიანი. გადაწყვეტილების გადადება ზიანს მიაყენებს ევროკავშირის იმიჯს“ - აცხადებს ევროპარლამენტარი, ანდრეს მამიკინსი.