ყოფილი პრემიერის, ბიძინა ივანიშვილის შეფასებით, თუ ტელეკომპანია „რუსთავი 2“-ის გადამღებ ჯგუფზე თავდასხმა მართლა მოხდა, ეს დასაგმობია.

თუმცა როგორც ივანიშვილმა ჟურნალისტებს განუცხადა, ამის შესახებ ის ინფორმაციას არ ფლობს.

„აუფ, ძალიან განსაცდელია - ეს ხუმრობით, მაგრამ სერიოზულად თუ ეს მოხდა, ძალიან დასაგმობია, ამას იუმორი არ სჭირდება. არ მინახავს და არ ვიცი“, - აღნიშნა ივანიშვილმა.

შინაგან საქმეთა სამინისტროს ცნობით, მიმდინარე წლის 19 ივნისს, თბილისის საერთაშორისო აეროპორტის მოსაცდელ დარბაზში, მას შემდეგ, რაც ტელეკომპანია „რუსთავის 2“-ის გადამღებმა ჯგუფმა პროფესიული საქმიანობა დაასრულა, აღნიშნული ტელეკომპანიის ოპერატორ გიორგ ც.-ს მოქალაქე ალექსანდრე ს.-მ სიტყვიერი შეურაცხყოფა მიაყენა და შემთხვევის ადგილს გაეცალა.    

როგორც შსს-ს განცხადებაშია ნათქვამი, გამოძიებით დადგინდა, რომ მას გიორგი ც. დაედევნა და ფიზიკური შეურაცხყოფა მიაყენა, რის შემდეგაც მათ შორის სიტყვიერი და ფიზიკური დაპირისპირება დაიწყო.  

„კონფლიქტის ადგილზე ამ დროს იმყოფებოდნენ ტელეკომპანია „რუსთავი 2“-ის ჟურნალისტი და საქართველოს პარლამენტის ერთ-ერთი წევრი. ამ უკანასკნელის განცხადებით, როდესაც იგი მობილური ტელეფონით ცდილობდა კონფლიქტის გადაღებას, ალექსანდრე ს.-ს თანმხლებმა ქალბატონმა თამარ ლ.-მ, პროტესტის ნიშნად, მას სიტყვიერი და ფიზიკური შეურაცხყოფა მიაყენა. პარლამენტარმა სამედიცინო დახმარებაზე უარი განაცხადა“,-აცხადებენ უწყებაში. 

სამართალდამცველებმა ცემის ფაქტზე 1970 წელს დაბადებული თამარ ლ. გამოავლინეს. რაც შეეხება გიორგი ც.-ს და ალექსანდრე ს.-ს, ორივე პირი გამოკითხულია და წინასწარი მონაცემებით, მათ ერთმანეთის მიმართ პრეტენზია არ გააჩნიათ. აღნიშნულ ფაქტთან დაკავშირებით გამოძიება სსკ-ს 125-ე მუხლით (ცემა) მიმდინარეობს.