საპარლამენტო ფრაქცია „ქართული ოცნების“ თავმჯდომარის, გიორგი ვოლსკის შეფასებით, „საქართველოს ახალგაზრდა იურისტთა ასოციაციის“ (საია) განცხადებები ბოლო პერიოდში ძალიან პოლიტიზებულია.

აღნიშნულით ვოლსკი სისხლის სამართლის კოდექსში არჩევნებთან დაკავშირებული ახალი მუხლის დამატებაზე საიას კრიტიკას ეხმაურება.

მისი განმარტებით, კანონპროექტი მნიშვნელოვანია, რადგან ის ძალადობის პრევენციას მოახდენს.

„საია-ს განცხადებები ბოლო პერიოდში ძალიან პოლიტიზებულია. საარჩევნო უბნებთან სამართალდამცავების ყოფნა, ეს არ არის ის თემა, რომელიც უკავშირდება პოლიტიკას. პოლიცია საჭიროა საარჩევნო უბნებთანაც და ყველა ისეთ ადგილებში, სადაც თავშეყრა იქნება არჩევნების დროს თუ სხვა პერიოდში“,- განაცხადა ვოლსკიმ.

გუშინ საია-მ სისხლის სამართლის კოდექსში არჩევნებთან დაკავშირებული ახალი მუხლის დამატებასთან დაკავშირებით განცხადება გაავრცელა. საია-ს განცხადებით, კანონპროექტის განმარტებითი ბარათი არ მოიცავს ამ მიმართულებით განვითარებულ სიღრმისეულ მსჯელობას, ისევე როგორც არ უთითებს კონკრეტულ გარემოებებსა და პრაქტიკაში იდენტიფიცირებულ პრობლემებზე, რაც საბოლოო ჯამში სპეციალური მუხლის შემოღების განმაპირობებელი გახდა.

მთავრობის ინიციატივით შემუშავებული კანონპროექტით, პასუხისმგებლობა მკაცრდება საარჩევნო უბანზე ან მის მიმდებარე ტერიტორიაზე მომხდარი ძალადობისთვის. კანონპროექტი ითვალისწინებს ასევე განსაკუთრებულ შემთხვევებში საარჩევნო კომისიის თავმჯდომარის თანხმობის გარეშე პოლიციელების ყოფნას კენჭისყრის შენობის მიმდებარე ტერიტორიაზე.