ჩეხური არაკომერციული ორგანიზაციის "ადამიანი გაჭირვებაში" (PIN) პროექტის "სოციალური დაცვის საკითხებზე მომუშავე არასამთავრობო ორგანიზაციების ჩართულობის გაძლიერება სტრატეგიულ დიალოგში საქართველოში" ფარგლებში ხონში სოციოლოგიური კვლევა ჩატარდა.

როგორც guardian.ge–ს ხონის მუნიციპალიტეტიდან აცნობეს, გამოიკითხნენ სხვადასხვა მოწყვლადი ჯგუფის წარმომადგენლები. კვლევაში მონაწილეობა მიიღეს პროექტის ფარგლებში შექმნილი მრჩეველთა საბჭოს წევრებმაც. გამოკითხვის მიზანი ოთხ მუნიციპალიტეტში (ხონი, ზუგდიდი, ტყიბული, გორი) კვლევის შედეგებზე დაყრდნობით სოციალური ჩართულობის სტრატეგიის შემუშავებაა. შედეგებში აისახება მოსახლეობის საჭიროებები და გამოვლინდება თანამონაწილეობის ინოვაციური მიდგომები, რაც ხელს შეუწყობს დაინტერესებული მხარეების უკეთეს კოორდინაციას, ბენეფიციართათვის მომსახურების გაუმჯობესებას და სხვა საჭიროებებზე რეაგირების პოლიტიკის შექმნას.

პროექტი დაფინანსებულია ევროკავშირის და ჩეხეთის საგარეო საქმეთა სამინისტროს მიერ და მისი მიზანია თანამშრომლობის გაღრმავება და გაძლიერება სამოქალაქო და საჯარო სექტორს შორის, ერთობლივი ორგანოს - მრჩეველთა საბჭოს ჩამოყალიბება, სოციალურ საკითხებზე ორწლიანი სტრატეგიის შემუშავება და ოთხ მუნიციპალიტეტში PIN- თან ერთად სოციალური სტრატეგიის შემუშავება და დანერგვა.

ხონის მუნიციპალიტეტში კვლევა საქართველოს სტრატეგიული კვლევებისა და განვითარების ცენტრის სპეციალისტებმა განახორციელეს და შედეგები უახლოეს მომავალში გამოქვეყნდება.