ახალქალაქის მუნიციპალიტეტში წელს განსახორციელებელი ორი მსხვილი ინფრასტრუქტურული პროექტი დასრულდა. როგორც guardian.ge-ს მუნიციპალიტეტის გამგებელმა, ედუარდ აღასარიანმა განუცხადა, ახალქალაქს რეაბილიტირებული სტადიონი და წყალგაყვანილობის სისტემა აქვს.

„დაგეგმილი გვქონდა, რომ სტადიონისა და წყალგაყვანილობის რეაბილიტაციას ივნისის შუა რიცხვებში დავასრულებდით, გეგმა შევასრულეთ.

სტადიონზე ძირითადად კეთილილმოწყობითი სამუშაოები ჩატარდა - გაკეთდა სკამები, გასახდელები, საპირფარეშოები. სამუშაოები დავიწყეთ ერთი თვის წინათ. პროექტი რეგიონული განვითარების ფონდიდან დაფინანსდა და მასზე ჯამში, 73 000 ლარი დაიხარჯა.
რაც შეეხება წყალგაყვანილობის სისტემის რეაბილიტაციას, დავიწყეთ 5 მაისს და ძალიან დიდი სამუშაოები გავწიეთ. წყალგაყვანილობის პროექტი რეგიონული განვითარების ფონდმა 141 000 ლარით დააფინანსა“- აღნიშნა აღასარიანმა guardian.ge-სთან საუბრისას.

მისივე ცნობით, ამჟამად აქტიური სამუშაოები ადმინისტრაციულ ცენტრში ქუჩების მოასფალტებაზე მიმდინარეობს.

„რეაბილიტაცია გრძელდება კნუნიანცის, ანდრანიკ მარქარიანის, ვანციანა სპანდარიანის ქუჩებზე. ადმინისტრაციული ცენტრის 6 ქუჩა უკვე სრულად მოეწო. მიმდინარეობის პროცესშია ასევე ახალქალაქი-ბავრას დამაკავშირებელი გზის სარეაბილიტაციო სამუშაოები. პარალელურად, სრულდება სამუშაოები 8 მრავალბინიანი საცხოვრებელი სახლის ეზოების კეთილმოსაწყობად. გზების რეაბილიტაცია უკვე დასრულებული უნდა იყოს, თუმცა, ხშირი წვიმები გვიშლის ხელს“, - აღნიშნა ედუარდ აღასარიანმა და დაამატა, რომ მუნიციპალიტეტისთვის წელს განსაკუთრებულად პრიორიტეტულია მესაქონლეობა და მეკარტოფილეობა და სწორედ ამ კუთხით, მნიშვნელოვანი მხარდაჭერა და ხელშეწყობა ხორციელდება ადგილობრივი მოსახლეობისთვის.