ხმის მიმცემთა რეკორდულად მაღალი მაჩვენებელი დარეგისტრირდა დიდ ბრიტანეთში 23 ივნისის რეფერენდუმზე, სადაც გადაწყდება დარჩება თუ გავა დიდი ბრიტანეთი ევროკავშირიდან. ქვეყნის საარჩევნო კომისიამ განაცხადა, რომ თითქმის 46.5 მილიონმა (46, 499, 537) ადამიანმა ხელმოწერით დაადასტურა 23 ივნისის რეფერენდუმში ხმის მიცემის სურვილი. წინა მონაცემები, რომელიც 2015 წლის საპარლამენტო არჩევნებს შეეხება, ასევე მაღალ მაჩვენებელს შეადგენდა და ხმის მიცემამდე 46, 354, 197 ამომრჩეველი იყო დარეგისტრირებული.

გერმანული გამოცემა "დოიჩე ველე" წერს, რომ ბრიტანეთის საპარლამენტო არჩევნების ანალოგიურად, ახლანდელ რეფერენდუმშიც, ირლანდიის მოქალაქეებს, რომლებიც ბრიტანეთში ცხოვრობენ – დაახლოებით 500, 000 ადამიანი – უფლება აქვთ ხმის მიცემის, ისევე როგორც ამგვარი უფლება გააჩნიათ თანამეგობრობის იმ მოქალაქეებს, რომლებიც ბრიტანეთში ცხოვრობენ, მათ შორის ევროკავშირის წევრი ქვეყნების კვიპროსისა და მალტის მოქალაქეებს. ევროკავშირის წევრი ქვეყნების სხვა მოქალაქეები კი რეფერენდუმში მონაწილეობას ვერ მიიღებენ.

დიდი ბრიტანეთის პრემიერ მინისტრი, რომელიც ქვეყნის ევროკავშირში დარჩენის მომხრეა, წინასწარმეტყველებს, რომ თუ დიდი ბრიტანეთის მოქალაქეები ხმას მისცემენ დარჩენას, ქვეყანაში "ინვესტიციების ტალღა შემოიჭრება."

"ძალიან ახლოს ვდგავართ; არავინ იცის რა მოხდება," განუცხადა ქამერონმა ინტერვიუში გაზეთ "ფაინენშალ თაიმსს".

პრემიერ მინისტრმა თავის ბოლო მიმართვაში უფროსი თაობის მოქალაქეებს განსაკუთრებით მოუწოდა იფიქრონ იმ შედეგებზე, თუ რა გავლენას იქონიებს ევროკავშირის დატოვება ქვეყანასა და მომავალ თაობებზე. გამოკითხვის წინასწარი მონაცემები აჩვენებს თაობათა შორის ნათელ დაყოფას. ახალგაზრდები უფრო დარჩენას ემხრობიან, ხოლო უფროსი თაობის ადამიანების უმეტესი ნაწილი მხარს ბრიტანეთის ევროკავშირიდან გასვლას უჭერს.