პარტია „ერთიანი ნაციონალური მოძრაობის“ ერთ-ერთი წევრის, გივი თარგამაძის განცხადებით, სამართალდამცავებმა ე.წ. კანონიერი ქურდის, დავით გერლიანის დაკავება მხოლოდ იმის გამო გადაწყვიტეს, რომ მის საქართველოში ჩამოსვლას და შსს-ს რეაგირების არ ქონას, საზოგადოების პროტესტი მოჰყვა.

„როგორც მინიმუმ ეს არის უნიათობა, იმიტომ რომ საქმეები ამ ადამიანებზე უნდა იყოს აღძრული. მოხსნეს კამერები აეროპორტში, ეს უნდა არსებობდეს, იმიტომ, რომ ფეის-კონტროლით მოხდეს იდენტიფიცირება. სხვა შემთხვევაში, მე მაინც ვთვლი, რომ ეს არის წინასწარი გარიგება, ის უბრალოდ გაატარეს საზღვარზე, შემდეგ საზოგადოებრივი აღშფოთების გამო მოუხდათ მისი დაკავება. ის მოძრაობდა ერევნის მიმართულებით, რაც მოწმობს ჩემს გუშინდელ სიტყვებს, რომ ერევანში არის ერთ-ერთი ყველაზე დიდი ცენტრი ქართველი კანონიერი ქურდების, შაქრო კალაშოვის მეთაურობით, რომელიც ემზადება წინასაარჩევნოდ“,-განაცხადა გივი თარგამაძემ.

დღეს ცნობილი გახდა, რომ ე.წ. კანონიერ ქურდი დავით გერლიანი საქართველო-სომხეთის საზღვრის უკანონო გადაკვეთისას დააკავეს.

მიმდინარე წლის 18 ივნისს, გივი თარგამაძემ „ფეისბუქის“ საკუთარ გვერდზე დაწერა, რომ  ოდესიდან თბილისის რეისით საქართველოში დეპორტირებულ იქნა 2014 წელს თურქეთში კანონიერ ქურდად კურთხეული, 1972 წელს სოხუმში დაბადებული დავით ნუგზარის-ძე გერლიანი. მისი თქმით, უკრაინიდან დეპორტაციის შემდეგ კრიმინალური ავტორიტეტი საქართველოში ჩამოვიდა და აეროპორტის ტერიტორია უპრობლემოდ დატოვა.