კომერციული ატაშეს ინსტიტუტი იქმნება, რომელიც ქვეყნის საელჩოებთან და დიპლომატიურ წარმომადგენლობებთან ერთად ბიზნეს და საინვესტიციო პროექტების განხორციელებაში იქნება ჩართული.

აღნიშნული ცვლილება „დიპლომატიური სამსახურის შესახებ“ საქართველოს კანონში შედის, რომელსაც დეპუტატებმა მხარი ერთხმად დაუჭირეს.

საკითხი სხდომაზე, საქართველოს ეკონომიკისა და მდგრადი განვითარების მინისტრის მოადგილემ, ირმა ქავთარაძემ წარადგინა.

მომხსენებლების განმარტებით, კომერციული ატაშე, დიპლომატიური წარმომადგენლობის პერსონალის შემადგენლობაში შედის და სავაჭრო-ეკონომიკური (კომერციულ) ხასიათის ურთიერთობებში თავისი კომპეტენციის ფარგლებში საქართველოს წარმოადგენს. იგი დიპლომატიური წარმომადგენლობის ხელმძღვანელის ოპერატიულ და საქართველოს ეკონომიკისა და მდგრადი განვითარების მინისტრის ადმინისტრაციულ დაქვემდებარებაში იქნება.

წარმოდგენილი ცვლილებების თანახმად, განისაზღვრება კომერციული ატაშეს სტატუსი და ის ხდება უფროსი დიპლომატიური თანამდებობა. კომერციული ატაშეს თანამდებობაზე ნიშნავს ეკონომიკისა და მდგრადი განვითარების მინისტრი, საგარეო საქმეთა სამინისტროსთან შეთანხმებით.

პროექტით, განისაზღვრება კომერციული ატაშეს სტატუსი, ფუნქციები, საქმიანობის ძირითადი მიმართულებები, მათი ხარჯების ანაზღაურება და სხვა საკითხები. საქართველოს ეკონომიკისა და მდგრადი განვითარების სამინისტრომ 2016 წლის 31 დეკემბრამდე უნდა უზრუნველყოს კომერციული ატაშეების თანამდებობრივი სარგოების, შენახვის ხარჯების, მათი და მათი ოჯახის დაზღვევის, მათი სამსახურის გავლის, გამოწვევის, სოციალური დაცვისა და გარანტიების წესების დამტკიცება.