პარტია „ერთიანი ნაციონალური მოძრაობის“ ერთ-ერთი წევრის,  ადვოკატის, ოთარ კახიძის განცხადებით, ხელისუფლება ყველაფერს აკეთებს ტელეკომპანია „რუსთავი 2“-ის ხელში ჩასაგდებად, რადგან  არჩევნების შედეგის ეშინია.

აღნიშნულით კახიძე, „რუსთავი 2“,-სთვის სააპელაციო სასამართლოს განჩინების ჩაბარების ვადების საკითხს ეხმაურება.

„სასამართლოს არსად არ უწერია კანონში, რომ მას შეუძლია გაგზავნოს ეს გადაწყვეტილება მე-12 დღეს, ეს არის კანონის პირდაპირი დარღვევა. ისინი ვალდებულები არიან ამ საკითხზე გამოიკვლიონ, რაშია საქმე. მიზანი არის მარტივი, ივანიშვილის დაკვეთა არის მარტივი, „რუსთავი 2“-ის ჩახშობა უნდა მოხდეს არჩევნებამდე,“ - განაცხადა ოთო კახიძემ.

გუშინ „რუსთავი 2“-ის გენერალურმა დირექტორმა, ნიკა გვარამიამ ბრიფინგი გამართა, სადაც განაცხადა, რომ სააპელაციო სასამართლომ „რუსთავი 2“-ის საქმეზე მიღებული გადაწყვეტილების შესახებ განჩინება ტელეკომპანიას  გაუგზავნა, რაც ვადების დარღვევით მოხდა. გვარამიას თქმით, ტელეკომპანიის მხარე გეგმავდა სააპელაციო სასამართლოს განჩინება 30-ე დღეს, კანონით გათვალისწინებულ ვადებში მიეღო, რათა მათთვის მიცემული დრო ბოლომდე გამოეყენებინა, თუმცა გვარამია აცხადებს, რომ სასამართლომ ტელეკომპანიას კუთვნილი 18 დღე მოპარა და განაჩენი დროზე ადრე გადაუგზავნა, რისი უფლებაც, სასამართლო ხელისუფლებას არ ჰქონდა.