თურქეთში საქართველოს პრეზიდენტის გიორგი მარგველაშვილის სამუშაო ვიზიტი დასრულდა. ვიზიტის ფარგლებში იგი მსოფლიო ეკონომიკური ფორუმის მუშაობაში მონაწილეობდა.

მარგველაშვილის შეფასებით, ასეთ ფორუმებში მონაწილეობას ძალზე დიდი მნიშვნელობა აქვს, რადგან, მისი აზრით, "მსგავს ფორუმებზე გვეძლევა შეხვედრების შესაძლებლობა უმნიშვნელოვანეს პოლიტიკოსებთან და ბიზნესწრეების წარმომადგენლებთან. ასევე გვეძლევა შესაძლებლობა, მათ ჩვენი ქვეყანა გავაცნოთ და ის პრიორიტეტული მხარეები წარმოვაჩინოთ, რომლებიც საქართველოს მათთვის უფრო მიმზიდველს გახდის“, - განაცხადა პრეზიდენტმა.

მარგველაშვილმა ასევე აღნიშნა, რომ მას შესაძლებლობა ჰქონდა ესაუბრა იმის თაობაზე, თუ რას აძლევს ღრმა და ყოვლისმომცველი თავისუფალი ვაჭრობის შეთანხმების ხელმოწერა როგორც საქართველოს, ისე მეგობარ ქვეყნებს.

„ყურადღება იმ ტრანსნაციონალურ პროექტებზეც გავამახვილეთ, რომლებიც კასპიის ზღვის აუზიდან იწყება და შავი ზღვის აუზში გადადის. ასევე ქართული ეკონომიკის ლიბერალური და ღია სტანდარტები განვიხილეთ. მსგავსი შეხვედრები შედეგს აუცილებლად მოგვცემს, მით უმეტეს, რომ საქართველოს მიმართ ინტერესი სულ უფრო იზრდება. ეს არის ქვეყანა, რომელიც ევროპას და აზიას ერთმანეთთან აკავშირებს, რომელიც უკვე არის ევროპული, ყველაზე ძლიერი ბაზრის ნაწილი“, - განაცხადა საქართველოს პრეზიდენტმა.

გიორგი მარგველაშვილი თურქეთის ტელეკომპანიის TRT-ს გადაცემის World News-ის სტუმარიც იყო, სადაც მან, საქართველო-თურქეთის ურთიერთობასა, ქვეყნის საგარეო პოლიტიკასა, ეკონომიკურ მიზნებსა და სხვა საკითხებთან დაკავშირებულ შეკითხვებს უპასუხა.