ეკონომიკურ საკითხებში პრეზიდენტის მრჩევლის გიორგი აბაშიშვილის განცხადებით, დავოსის ეკონომიკურ ფორუმში პრეზიდენტის მონაწილეობასთან დაკავშირებით, ჯერჯერობით რაიმე ტიპის სპეციალური მსჯელობა არ ყოფილა.

როგორც მან ტელეკომპანია „რუსთავი 2“-თან საუბარში აღნიშნა, პრეზიდენტი ზოგადად, ძალიან ბევრი ღონისძიებიდან ბევრ მიწვევას იღებს და მხოლოდ პრეზიდენტს შეუძლია გადაწყვიტოს რომელ ღონისძიებაში მიიღებს მონაწილეობას.

„ეს ყველაფერი წყდება სწორედ ღონისძიების რანგიდან, პრეზიდენტის გრაფიკიდან და ღონისძიებაში მონაწილეობის მიზანშეწონილობიდან გამომდინარე. დავოსთან დაკავშირებით შეთავაზება მოხდა გუშინ. შესაბამისად, ამ თემაზე რაიმე ტიპის სპეციალური მსჯელობა არ ყოფილა. აბსოლუტურად არ მესმის რატომ მოხდა თემის აჟიტირება და ტექნიკურ დეტალებზე საუბარი მაშინ, როცა უფრო მნიშვნელოვანი იყო პრეზიდენტის მსოფლიო ეკონომიკურ ფორუმში მონაწილეობის შეფასება შინაარსობრივი თვალსაზრისით“, - განაცხადა გიორგი აბაშიშვილმა.

საქართველოს პრეზიდენტი გიორგი მარგველაშვილი დავოსის ეკონომიკურ ფორუმზე მსოფლიოს ეკონომიკური ფორუმის თავმჯდომარემ, პროფესორმა კლაუს შვაბმა გუშინ მიიწვია. ამის შესახებ თურქეთში, მარგველაშვილისა და შვაბის შეხვედრის შემდეგ, სწრედ აბაშიშვილის მიერ გაკეთებული განცხადებით გახდა ცნობილი.

საგარეო საქმეთა მინისტრ მაია ფანჯიკიძის განცხადებით კი, დავოსის ეკონომიკურ ფორუმზე მიწვევა პრემიერ-მინისტრმა ირაკლი ღარიბაშვილმა ჯერ კიდევ მაისში მიიღო და ქართულმა მხარემ, ფორუმში მთავრობის მეთაურის მონაწილეობა დაუდასტურა.