პარტია „ერთიანი ნაციონალური მოძრაობის“ წარმომადგენელის, სალომე სამადაშვილის განცხადებით, 45 ევროპარლამენტარი საქართველოს პრეზიდენტს მიმართავს, იმოქმედოს მისთვის მინიჭებული უფლებით და მოიქცეს ისე, როგორც სხვა პრეცენდენტების დროს, როცა ევროპულმა სასამართლომ პირის პატიმრობასთან დაკავშირებით მე-18 მუხლის დარღვევა დაადგინა.

როგორც დღეს გამართულ ბრიფინგზე სამადაშვილმა აღნიშნა,  ის იმედოვნებს, რომ ხელისუფლება და პრეზიდენტი ყურადღებით მოეკიდებიან ამ გზავნილს.

„საქართველო შედის ძალიან მნიშვნელოვან წინასაარჩევნო პერიოდში, რომელიც სულ უფრო მეტად ხდება საერთაშორისო თანამეგობრობის დაკვირვების საგანი. გუშინ სწორედ ამ კონტექსტში გაკეთდა ძალიან მნიშვნელოვანი დეკლარაცია, რომელსაც 45 ევროპელმა პოლიტიკოსმა ხელი მოაწერა. მათ საქართველოს პრეზიდენტს მიმართეს, იმოქმედოს მისთვის მინიჭებული უფლებით და მოიქცეს ისე, როგორც სხვა პრეცენდენტების დროს, როცა ევროპულმა სასამართლომ პირის პატიმრობასთან დაკავშირებით მე-18 მუხლის დარღვევა დაადგინა. მხედველობაში მაქვს ევროსასამართლოს გადაწყვეტილება ივანე მერაბიშვილის საქმესთან დაკავშირებით.

აღსანიშნავია, რომ ხელმომწერი პოლიტიკოსები სხვადასხვა პოლიტიკურ ჯგუფებს წარმოადგენენ და ფაქტობრივად მთელ ევროპულ პოლიტიკურ სპექტრს ფარავენ.

იმედი მაქვს, რომ ხელისუფლება და პრეზიდენტი ყურადღებით მოეკიდებიან ამ გზავნილს, რადგან, ჩვენ ვიცით, რომ ევროპის საბჭო ყველაზე მაღალი ავტორიტეტის მქონე ორგანიზაციაა, რომელიც ადგენს თუ როგორ სრულდება ჩვენს ქვეყანაში დემოკრატიული სტანდარტები“, - განაცხადა სამადაშვილმა.