თბილისის საკრებულოს ფრაქცია „ნაციონალური მოძრაობის“ წარმომადგენლები ნოდარ ხადურის დღეს გაჟღერებულ იმ ინიციატივას ეხმაურებიან, რომლის თანახმადაც მომავალი წლის 1 იანვრიდან ყველა უწყებას, მათ შორის, თვითმმართველობის ორგანოებს, ანგარიშები ხაზინაში ექნებათ და მათ მომსახურებას ხაზინა გაუწევს. ისინი მიიჩნევენ, რომ მთავრობის ეს გადაწყვეტილება თბილისის ბიუჯეტში საბანკო პროცენტების სახით შემოსავლის წყაროს გაუქმებას გამოიწვევს, რაც ქვეყანაში თვითმმართველობების ინსტიტუციური გაძლიერების პროცესში უკან გადადგმული ნაბიჯია.

„ნაციონალების“ განცხადების თანახმად, ბიუჯეტსი ხაზინაში გადატანა ადგილობრივი თვითმმართველობების დამოუკიდებლობის შეზღუდვისა და მათი საბიუჯეტო შემოსავლების შემცირებისკენ გადადგმული კიდევ ერთი მავნებლური ნაბიჯია.

„საქართველოს მთავრობის ეს გადაწყვეტილება ნიშნავს, რომ ადგილობრივ თვითმმართველობებს ნებისმიერი ფინანსური ტრანზაქციის განხორცილებაზე სახელმწიფო ხაზინის თანხმობა დასჭირდება და რაც ასევე მნიშვნელოვანია, ადგილობრივი ბიუჯეტი შემოსავლის სახით, საბანკო ანგარიშებზე განთავსებულ თანხებზე დარიცხულ პროცენტებს ვეღარ მიიღებს. 2013 წელს თბილისის ბიუჯეტში პროცენტების სახით, 9 239 000 ლარი შემოვიდა, ხოლო 2014 წელს 6 931 000 ლარის მიღებაა დაგეგმილი. ამ შემოსავლის წყაროს გაუქმება, ისევე, როგორც თვითმმართველობის ორგანოების მოქმედების თავისუფლების შეზღუდვა ცენტრალური ხელისუფლების მიერ, ქვეყანაში თვითმმართველობების ინსტიტუციური გაძლიერების პროცესში უკან გადადგმული ნაბიჯია“, - ნათქვამია ფრაქცია „ნაცმოძრაობის“ განცხადებაში.

საკრებულოს უმცირესობის დეპუტატები ადგილობრივი თვითმმართველობების ეროვნულ ასოციაციას, მის პრეზიდენტ დავით ჯიქიას და თბილისის მერ დავით ნარმანიას მოუწოდებენ, აღნიშნული ნაბიჯი შეაფასონ და თვითმმართველობის ორგანოების ინტერესების დაცვისას პრინციპულობა გამოიჩინონ.