თავდაცვის მინისტრის, თინა ხიდაშელის განცხადებით,  გიგა ოთხოზორიას მკვლელისთვის შინაპატიმრობა არ არის საკმარისი.

როგორც ხიდაშელმა ჟურნალისტებთან საუბრისას აღნიშნა, მკვლელი კანონის სრული სიმკაცრით უნდა დაისაჯოს.

,,უკვე კარგია, რომ რაღაც რეაქცია მოჰყვა ამ საზარელ მკვლელობას, თუმცა სამწუხაროა, რომ დე ფაქტო ხელისუფლება ბოლომდე ვერ აცნობიერებს, რა მასშტაბის პრობლემასთან აქვს საქმე. ეს არის ალბათ ბოლო წლების განმავლობაში ერთ-ერთი ყველაზე ცინიკური მკვლელობა, რომლის შესახებაც ჩვენ გვსმენია და გვინახავს. არავის არ მატებს ღირსებას ასეთი ადამიანებისთვის ხელის დაფარება. როგორი დე ფაქტო თუ თვითაღიარებულიც არ უნდა იყო, არსებობს ელემენტარული ამბები, რომელსაც ყოველთვის მნიშვნელობა აქვს და ანგარიში უნდა გაუწიო. ასეთი სისასტიკით ჩადენილი მკვლელობაზე პასუხი არის ცალსახა და ის ადამიანი კანონის მთელი სიმკაცრით უნდა დაისაჯოს, იმის მიუხედავად, ჩვენ ვაღიარებთ თუ არ ვაღიარებთ აფხაზეთის კანონმდებლობას, ეს არის ელემენტარული ადამიანური ღირსების საქმე, რომ ასეთ მკვლელობას ადეკვატური პასუხი გასცე. ვფიქრობ, რომ შინაპატიმრობა არ არის საკმარისი, მაგრამ კარგია როცა რეაგირება მოჰყვა ამ ამბავს. იმედია, ადეკვატურები იქნებიან დე ფაქტო ხელისუფლების წარმომადგენლები“, - განაცხადა თინა ხიდაშელმა.

გიგა ოთხოზორიას მკვლელობაში ეჭვმიტანილ რაშიდ კანჯი-ოღლუს ოკუპირებული აფხაზეთის დე-ფაქტო სამხედრო სასამართლომ შინაპატიმრობა მიუსაჯა. აფხაზეთის დე-ფაქტო სამხედრო პროკურორმა, ადგურ აგრბამ ამის შესახებ „სპუტნიკ აბხაზიას“ განუცხადა. მისი თქმით, „სამხედრო სასამართლომ არ დააკმაყოფილა სამხედრო პროკურატურის შუამდგომლობა კანჯი-ოღლუს დაპატიმრების შესახებ“.

რაშიდ კანჯი-ოღლი საქართველოს მოქალაქის გიგა ოთხოზორიას განზრახ მკველობაშია ბრალდებული. ტრაგიკული შემთხვევა 19 მაისს, სოფელ ხურჩაში, საქართველოს მიერ კონტროლირებად ტერიტორიაზე მოხდა.