გერმანიის კანცლერმა ანგელა მერკელმა დიდი ბრიტანეთის გადაწყვეტილებას ევროკავშირის დატოვებასთან დაკავშირებით, ევროპისა და ევროპული ერთიანობის წყალგამყოფი უწოდა. როგორც "დოიჩე ველე" წერს, ახლა სწორედ მერკელზე და ევროკავშირის სხვა ლიდერებზეა დამოკიდებული მისცენ გარანტიები სხვა ქვეყნებს, არ მიჰყვნენ ბრიტანეთის მაგალითს.

"არ არის გზა ამის გარშემო: დღევანდელი დღე ევროპისა და ევროპული ერთიანობისთვის არის წყალგამყოფი," განაცხადა მერკელმა, სანამ დაჟინებით მოუწოდებდა ევროკავშირის ლიდერებს, არ ყოფილიყვნენ მოუზომავნი და აჩქარებულნი ბრიტანეთის რეფერენდუმზე პასუხის გაცემისას.

"დოიჩე ველე" წერს, რომ როგორც ევროპის ყველაზე გავლენიანმა ლიდერმა და ევროპის უდიდესი ეკონომიკის მქონე ქვეყნის მეთაურმა, მერკელმა, ახლა უნდა უხელმძღვანელოს დიდი ბრიტანეთის ევროკავშირთან ურთიერთობებში ახალი პირობებით წარსამართ მოლაპარაკებებს, მათ შორის მსოფლიოში ყველაზე დიდ ერთიან ბაზარზე ბრიტანული კომპანიების შესვლის ხელმისაწვდომობის შესახებ მოლაპარაკებებსაც.

მერკელის განცხადებისაგან განსხვავებით, ევროკავშირის ლიდერებმა დაჟინებით მოუწოდეს დიდ ბრიტანეთს, რაც შეიძლება სწრაფად გადავიდნენ ორგანიზაციასთან დატოვების მოლაპარაკებებზე, რადგან მიაჩნიათ, რომ დაყოვნება გაურკვეველობას გაახანგრძლივებს.

ევროპული კომისიის ხელმძღვანელმა ჟან კლოდ იუნკერმა ხაზი გაუსვა, რომ “კავშირი, რომელშიც 27 წევრი რჩება, არსებობას განაგრძობს.”

მერკელმა ასევე თქვა, რომ ის ნებისმიერი მოლაპარაკებებისას გერმანელი მოქალაქეების და გერმანული ბიზნესების ინტერესებს დაიცავს.

დიდმა ბრიტანეთმა ისტორიულ რეფერენდუმში 52%–ით ევროკავშირის დატოვებას მისცა ხმა, მას შემდეგ რაც 43 წელი ამ კავშირში იმყოფებოდა. დარჩენის მომხრე კი 48% აღმოჩნდა.
ლონდონმა და შოტლანდიამ მყარად მისცეს ხმა ევროკავშირში დარჩენას, მაგრამ ჩრდილოეთ ინგლისის შედეგები ამ ხმებს ასუსტებს.

რეფერენდუმში მონაწილეობის მისაღებად დარეგისტრირებული თითქმის 46 მილიონი ამომრჩევლიდან ხმის მისაცემად 71.8% გამოცხადდა. ამომრჩეველთა მსგავსი ოდენობა 1992 წლის შემდეგ არ დაფიქსირებულა. უელსმა და ინგლისის უდიდესმა ნაწილმა, ლონდონის გამოკლებით, ხმა ევროკავშირის დატოვებას მისცა.