გერმანიის საგარეო საქმეთა მინისტრმა ფრანკ-ვალტერ შტაინმაიერმა განაცხადა, რომ ევროკავშირი არ უნდა ჩავარდეს „დეპრესიასა და დამბლაში“ მას შემდეგ, რაც დიდმა ბრიტანეთმა ბლოკიდან გასვლას მისცა ხმა.

მან აღნიშნული კომენტარი ბერლინში დაუყოვნებელი მოლაპარაკებების დასაწყებად ჩასული ევროკავშირის ექვსი დამფუძნებელი წევრი სახელმწიფოს საგარეო საქმეთა მინისტრების შეკრების წინ გააკეთა.

გერმანიის, საფრანგეთის, იტალიის, ბელგიის, ლუქსემბურგისა და ნიდერლანდების საგარეო სამქეთა მინისტრები ბრიტანეთის ევროკავშირიდან გასვლის პროცესის დაჩქარებას განიხილავენ. ასევე მოსალოდნელია, რომ მათ იმაზეც იმსჯელონ, თუ როგორ გადაათქმევინონ სხვებს არ მიჰყვნენ ბრიტანეთის მაგალითს.

ისინი ვინც ბერლინის შეხვედრას დაესწრებიან, რომელიც ადგილობრივი დროით 13:00 საათზე დაიწყება, იმ ქვეყნების წარმომადგენლები არიან, რომლებიც ორგანიზაციას 1950-იან წლებში შეუერთდნენ და ჯერ კიდევ ევროკავშირის მთავარ ძალებს წარმოადგენენ.

დიდმა ბრიტანეთმა 23 ივნისის ისტორიულ რეფერენდუმში 52%–ით ევროკავშირის დატოვებას მისცა ხმა, მას შემდეგ რაც 43 წელი ამ კავშირში იმყოფებოდა.

დევიდ ქამერონმა გუში განაცხადა, რომ ოქტომბერში, კონსერვატიული პარტიის ყრილობაზე ახალი თავმჯდომარის არჩევისთანავე დატოვებს პრემიერ მინისტრის პოსტს და ევროკავშირთან ურთიერთობებს მის შემცვლელს გადააბარებს.

დიდ ბრიტანეთს შეუძლია დაეყრდნოს ევროკავშირის ლისაბონის ხელშეკრულების 50-ე მუხლს, რომლის მიხედვითაც მას შესაძლებლობა აქვს ორგანიზაციიდან გამოსვლის პროცესი, თანმხლები მოლაპარაკებებით, 2 წლის განმავლობაში განაგრძოს, რისი წინააღმდეგიცაა ევროკავშირის ხელმძღვანელობა.

ევროკავშირის ლიდერები დაჟინებით მოუწოდებენ დიდ ბრიტანეთს, რაც შეიძლება სწრაფად გადავიდნენ ორგანიზაციასთან დატოვების მოლაპარაკებებზე, რადგან მიაჩნიათ, რომ დაყოვნება გაურკვეველობას გაახანგრძლივებს.

ევროპული კომისიის ხელმძღვანელმა ჟან კლოდ იუნკერმა ხაზი გაუსვა, რომ "კავშირი, რომელშიც 27 წევრი რჩება, არსებობას განაგრძობს."