ევროკომისიის თავმჯდომარის ჟან-კლოდ იუნკერის განცხადებით, ევროკავშირის ლიდერებმა უნდა შეიმუშავონ გეგმა, თუ როგორ გაუწიონ წინააღმდეგობა ევროპელ პოპულისტებს და გააგრძელონ დიალოგი ევროკავშირის იმ ქვეყნებთან, სადაც უკმაყოფილების დონე მაღალია.

მისი თქმით, დიდი ბრიტანეთის მსგავსად, შესაძლოა ევროკავშირში წევრობის საკითხზე რეფერენდუმის ჩატარება ევროკავშირის სხვა ქვეყნებმაც მოისურვონ.

„შესაძლოა დიდი ბრიტანეთის მსგავსად, ევროკავშირში წევრობის საკითხზე რეფერენდუმის ჩატარება ევროკავშირის სხვა ქვეყნებმაც მოისურვონ. სწორედ ამიტომ ევროკავშირის ლიდერებმა უნდა შეიმუშავონ გეგმა, თუ როგორ გაუწიონ წინააღმდეგობა ევროპელ პოპულისტებს და გააგრძელონ დიალოგი ევროკავშირის იმ ქვეყნებთან, სადაც უკმაყოფილების დონე მაღალია“,-განაცხადა ჟან-კლოდ იუნკერმა.

ჟან-კლოდ იუნკერის თქმით, აღნიშნული საკითხების შესახებ ევროკავშირის წარმომადგენლები მომავალ კვირას, ევროკავშირის რიგგარეშე სამიტზე იმსჯელებენ.

ორი დღის წინ დიდმა ბრიტანეთმა ისტორიულ რეფერენდუმში 52%–ით ევროკავშირის დატოვებას მისცა ხმა, მას შემდეგ რაც 43 წელი ამ კავშირში იმყოფებოდა. დარჩენის მომხრე კი 48% აღმოჩნდა.

აღნიშნულის შემდეგ ცნობილი გახდა, რომ სლოვაკი ულტრამემარჯვენეები სლოვაკეთის ევროკავშირიდან გასვლის საკითხზე რეფერენდუმის ჩასატარებლად ელექტრონული ხელმოწერების შეგროვებას იწყებენ; მსგავსი ვითარებაა ფინეთში, სადაც ახალგაზრდული ორგანიზაციის პარტიამ პეტიცია მოამზადა და ევროკავშირიდან გასვლის შესახებ რეფერენდუმის ჩატარებაზე ხელმოწერების შეგროვება დაიწყო.